LABORAL

O 80% do persoal de Bosch secunda a folga de 24 horas contra o ERTE en Vigo 

Traballadoras/es da empresa do sector dos centros de chamadas mobilizáronse diante da compañía

Un nutrido grupo de empregadas/os e delegadas/os sindicais do sector dos centros de chamadas aproveitou a xornada para desenvolver protestas diante das instalacións da compañía

Fotos: CIG

Infogauda / Vigo

 A folga de 24 horas convocada polo comité de Bosch para rexeitar o ERTE que a empresa aplica en Vigo está a ter un seguimento maioritario entre o cadro de persoal. Arredor do 80% das traballadoras/es da compañía do sector dos centros de chamadas decidiu secundar unha xornada de paro que aproveitaron para mobilizarse nas instalacións da Avenida de Madrid e de María Berdiales. 

“Non é un ERTE, é unha estafa”, “Despidos para os directivos” e “Este ERTE ímolo parar” foron as consignas que máis se escoitaron durante as concorridas concentracións que se desenvolveron diante dos centros de traballo de Bosch na Avenida de Madrid, primeiro, e na rúa María Berdiales, a continuación.  

 A presidenta do comité de empresa, Laura Pérez Figueroa, da CIG, expresou a satisfacción da representación sindical polo elevado seguimento que rexistra a folga convocada contra o ERE que Bosch está a aplicar dende o mes de febreiro.  

 Ademais, un nutrido grupo de empregadas/os e delegadas/os sindicais do sector dos centros de chamadas aproveitou a xornada para desenvolver protestas diante das instalacións da compañía, onde despregaron unha faixa e berraron consignas contra o ERE temporal que afecta a 540 persoas.