LABORAL

Paros de catro horas e manifestación para esixir a readmisión dos despedidos no CETEC 

A marcha sairá dende as instalacións de Copo en Mos este luns 28 ás 11:00 horas

Infogauda / Mos

 Os tres delegados de persoal (da CIG) no CETEC, centro tecnolóxico do grupo vigués de automoción Copo, convocan paros de catro horas por quenda de traballo e unha manifestación este luns 28 para reclamar a readmisión de dous compañeiros despedidos. Dende a central denuncian que mediante estas rescisións de contrato a compañía estase a desfacer de persoal con antigüidade para substituílo por traballadores/as en peores condicións laborais.  

 Segundo explican dende a representación sindical, a dirección do CETEC alude a supostas causas obxectivas para xustificar os despedimentos, “cando a empresa non só non ten perdas senón que no pasado exercicio superou as súas expectativas económicas”. Consideran que se trata dunha decisión totalmente inxustificada, polo que chaman o cadro de persoal a participar non paros e na manifestación que sairá dende a sede de Copo en Mos ás 11:00 horas.  

 Dende a CIG denuncian que detrás destes despidos agóchase unha estratexia da dirección para precarizar as condicións laborais mediante a contratación de persoal en peores condicións. “O actual xerente chegou hai dous anos coa clara intención de reestruturar a empresa co obxectivo de abaratar os salarios e precarizar o emprego”, sinalan.  

 Diante disto, amósanse convencidos/as de que o conflito laboral non tardará en estenderse ás distintas empresa do Grupo Copo, “tendo en conta a nova política de persoal que están a aplicar”. Tamén consideran que cos despidos o CETEC pretende coaccionar os traballadores/as de cara á negociación do convenio colectivo que terá lugar este ano.