CULTURA

A Cidade da Cultura inicia no ‘Día de Castelao’ un ciclo con expertos na época, na figura e na obra do intelectual galeguista 

‘Diálogos ao redor de Castelao’ contará con destacados especialistas en historia, arte, ilustración, política e movementos migratorios 

Arranca o 30 de xaneiro, data que se conmemora o nacemento de Castelao, co crítico de arte Carlos L. Bernárdez e rematará coa historiadora Pilar Cagiao  

O humorista gráfico Siro López e o ex Valedor do Pobo José Julio Fernández completan estas xornadas, que tamén contarán co comisario da mostra ‘Castelao maxistral’, Miguel Anxo Seixas

Infogauda / Santiago de Compostela

  A Cidade da Cultura de Galicia súmase aos actos polo ‘Día de Castelao’ —que se celebra o 30 de xaneiro, data do seu nacemento— botando a andar ese mesmo día o ciclo Diálogos ao redor de Castelao, un espazo de conversa, análise e reflexión sobre a época, a figura e a obra do intelectual galeguista, que contará coa participación de destacados especialistas en historia, arte, ilustración, política e movementos migratorios.  

 Estas xornadas, de balde con inscrición previa, inxírense dentro do programa de actividades para arroupar e dinamizar a exposición Castelao maxistral, do Museo Centro Gaiás, na que se exhibe por vez primeira en Galicia o icónico lenzo ‘A derradeira leición do mestre’, que xa foi visitada por máis de 25.000 persoas.  

 O ciclo arrancará o 30 de xaneiro coa participación de Carlos L Bernárdez, prestixioso historiador e crítico da arte, e seguiranlle os catro mércores seguintes o historiador e comisario de Castelao maxistral, Miguel Anxo Seixas; o humorista gráfico, xornalista e ensaísta Siro López; o ex Valedor do Pobo José Julio Fernández; e Pilar Cagiao, especialista en fenómenos migratorios e directora do Centro Interdisciplinario de Estudos Americanistas ‘Gumersindo Busto’, encargada de pór o alfinete a estas xornadas o 27 de febreiro.  

 Os Diálogos o redor de Castelao comezan con Carlos L. Bernárdez, quen abordará o peso da figura de Castelao na plástica galega. En concreto, centrarase no período da Guerra Civil. Pola súa banda, o 6 de febreiro, Miguel Anxo Seixas revelará polo miúdo como concibiu a mostra Castelao maxistral e achegaralles aos e ás participantes as últimas descubertas sobre o artista de Rianxo.  

 Ao seguinte mércores, día 13 de febreiro, será a quenda de José Julio Fernández. O ex Valedor do Pobo —e actualmente mestre de Dereito Constitucional da USC e director do Centro de Estudos de Seguridade— afondará nos debuxos de Castelao, pero desde a óptica da capacidade comunicativa dos mesmos nunha opinión pública democrática.  

 O recoñecido humorista gráfico, caricaturista e ensaísta Siro López participará o 20 de febreiro neste ciclo cunha intervención co suxestivo título ‘Castelao, o humor galego en Europa’. Débese destacar que o debuxante é todo un experto na figura do artista de Rianxo, xa que ten publicado Simplicissimus, Gulbransson e Castelao, onde desenvolve a influencia do humorista alemán Gulbransson sobre os traballos e caricaturas do intelectual galeguista; e Castelao na arte europea, na Real Academia Galega de Belas Artes.  

 Pilar Cagiao pechará o ciclo co que a Cidade da Cultura se suma a programación homenaxe ao ‘Día do Castelao’. A directora do Centro Inderdisciplinario de Estudos Americanistas ‘Gumersindo Busto’ intervirá o mércores 27 de febreiro no que incidirá no exilio ao que se viu obrigado Castelao na Arxentina, e moitas e moitos dos seus coetáneos, xa que é especialista en movementos migratorios e as relacións culturais entre España e América. Precisamente, a súa tese doutoral ‘Participación económico social da inmigración galega en Montevideo, 1900-1970’, lida na Universidade Complutense de Madrid (1990) mereceu Premio Extraordinario.  

Outras actividades ao redor de Castelao maxistral 

 Ademais destas xornadas, a Cidade da Cultura continúa co seu programa de actividades para dinamizar a exposición Castelao maxistral. Así, do 26 de febreiro ao 1 de marzo realizarase un ciclo de debate con escolares, moderado por xornalistas.  

 Precisamente, a comunidade educativa está a amosar un enorme interese pola exposición, xa que son preto de 4.000 escolares os que xa a teñen visitado desde a súa apertura e, a día de hoxe, xa está confirmado ata o peche da mostra —previsto para o 3 de marzo— un número similar, polo que a cifra final prevista é a de superar os 8.000 estudantes en Castelao maxistral, provenientes de centros de toda Galicia.