A GUARDA

A Guarda ofrece visitas guiadas regulares e gratuítas ao Monte Santa Trega 

Os dous próximos fins de semana de xullo 

Guía e visitantes no sector Calvo, do xacemento arqueóloxico do Monte Santa Trega (A Guarda), sen dúbida un dos lugares máis fermosos e visitados de Galicia

Foto: C. A. G.

 Infogauda / A Guarda

 A Oficina Municipal de Turismo do Concello de A Guarda fai saber que como cada ano pódese coñecer o Monte Santa Trega grazas á oferta de visitas guiadas a este espazo. Para estas dúas próximas semanas as visitas concentraranse o sábado e domingo cunha oferta de dous diferentes percorridos. 

 Polo tanto, as fins de semana do sábado 14 e domingo 15 e o sábado 21 e domingo 22 de xullo poderase coñecer o Monte Santa Trega acompañado dun guía. Aquelas persoas que desexen realizar unha visita guiada completa polo emblemático monte e coñecer máis polo miúdo o seu valor arqueolóxico, relixioso e paisaxístico, poderán participar nas saídas ás 12:30 h. e ás 17:00 h. do Museo Arqueolóxico de Santa Trega, MASAT. Dende alí, as e os participantes coñecerán as pezas expostas no museo e continuarán coa visita a ermida de Santa Trega para despois baixar polo sendeiro do Vía Crucis ata o Castro de Santa Trega onde se explicarán os contidos arqueolóxicos deste espazo escavado. Esta visita terá unha duración aproximada de 90 minutos. Ademais ás 11:30 ofrecerase a oportunidade de realizar unas visitas guiadas centradas unicamente no castro, cunha explicación do xacemento arqueolóxico de 30 minutos de duración. 

 As persoas interesadas en participar deberán presentarse á hora de saída no punto de encontro indicado. Malia que as visitas son gratuítas, compre ter en conta que o taxa de acceso ao Monte Santa Trega é de 1 € para as persoas adultas e de 0,50 € para os e as menores de 14 anos. Os grupos formados por máis de 10 persoas deberán reservar a súa visita previamente chamando ao Museo Arqueolóxico do Monte Santa Trega (986 610 504). 

 Proximamente anunciarase o novo calendario de visitas guiadas gratuítas para o resto de temporada 2018 con horarios ampliados.