BALONMÁN
Fernando Reyes González é o novo presidente do Club Balonmán Atlético Guardés
• O guardés, de 45 anos de idade e socio do Club dende 2019, colle as rendas da directiva da entidade miñota
• Nestes sete anos estivo implicado na actividade deportiva da entidade de distintos xeitos, como colaborador pero sobre todo a través das súas fillas, que xogan nos equipos Cadete e Benxamín da base
• Fernando Reyes: “Se había que sacar isto adiante e podía colaborar en que o Guardés non rematase, quería aportar o meu gran de area”
Redacción Deportes/A Guarda
O Club Balonmán Atlético Guardés xa ten novo presidente. O guardés Fernando Reyes González, de 45 anos e socio da entidade dende hai sete, colle as rendas á cabeza da Xunta Directiva da entidade e tomará a testemuña de Jesús López González despois de ofrecerse voluntario para resolver a falta de alternativas.
Así, tal e coma se anunciou na Asemblea Xeral Ordinaria de socios deste mércores, será precisamente un dos seus afeccionados quen ocupe o cargo. Reyes estivera afincado en Madrid ata 2019, momento no que regresou á Guarda e dende o cal foi, xunto coa súa familia, socio e fiel seguidor da actividade dos equipos da entidade baixomiñota. Acude con asiduidade aos partidos da Sangriña e tamén adoita desprazarse ás citas fóra da casa, coma a Copa da Raíña e outras ocasións sinaladas cada ano, e comparte unha vinculación persoal co Club a través das súas fillas, que xogan nos equipos Cadete e Benxamín da base. Foi tamén por elas que, especialmente nas dúas últimas campañas, comezaba a colaborar tamén en pequenas tarefas organizativas sempre que a Xunta Directiva o precisaba, coma por exemplo a raíz do Sector Nacional e a final europea celebrados o pasado mes de maio.
O novo presidente recolle a testemuña de Jesús López con ilusión, aínda que con menos previsión da que lle tería gustado. O motivo principal que alega para terse ofrecido foi a falta de alternativas: “Non quería que o Guardés se acabase, e estabamos no derradeiro minuto e sen unha saída clara”, explica. Foi esa urxencia por loitar pola supervivencia do proxecto o que o levou a dar o paso: “Se hai que sacar isto adiante e podo colaborar, pois vou aportar o meu graniño de area”.
Son as mocidades do Club, ademais, outra das razóns polas que cre que merece loitar malia as dificultades, xunto co que significan estes equipos para o conxunto do pobo guardés. “Para min é importante que haxa unha base de balonmán na vila, non só polas miñas fillas”, indica, “e é unha mágoa que teñamos isto, que é tan grande en comparación co tamaño da Guarda, e que poida chegar a perderse”, engade, facendo referencia ao paradoxal e triste feito de que esta complicada situación chegue no mellor momento da historia da entidade a nivel deportivo. Ademais, Reyes consideraba importante cumprir co “certo compromiso” que había xa co cadro de persoal e o corpo técnico contratado para o vindeiro curso 2026/2027.
Nos próximos días, a nova cabeza directiva do equipo baixomiñoto dirixirase á afección con proximidade e honestidade para darse a coñecer mentres confecciona unha Xunta Directiva renovada coa que traballar man a man polo futuro próximo. Os seus obxectivos principais, con paciencia e coa asesoría da dirección anterior, xa pode avanzalos: “Facer isto sostible, sanealo do xeito en que podamos e mantelo dentro do posible no máis alto do balonmán español, que é onde merece estar”.
Ningún comentario:
Publicar un comentario