A GUARDA

O BNG considera insuficiente o orzamento para a reforma da rúa San Caetano, na Cruzada  

Ángel Luis Baz Vicente (voceiro municipal do BNG no Concello de A Guarda): “Despois de dous anos, falan de 3 fases e na primeira apenas 57.000 € e nin sequera inclúen a toda a rúa. Estanse a rir da veciñanza”  

Ángel Luis Baz Vicente, voceiro municipal do BNG no Concello de A Guarda

Infogauda / A Guarda

 “O BLOQUE NACIONALISTA GALEGO considera insuficiente a dotación para a primeira fase de urbanización da rúa San Caetano, na Cruzada”, afirma Ángel Luis Baz Vicente, voceiro municipal do BNG no Concello de A Guarda.  

 “O BNG - engade Ángel Luis Baz -  lémbralle ao alcalde da Guarda que esta petición dos veciños e veciñas da Cruzada foi aprobada por unanimidade en setembro de 2.016. O proxecto xa sufriu un atraso ao non ser incluído no Plan Concellos 2.017, para sorpresa de todos, e no Plan Concellos 2.018 aproban unha primeira fase de apenas 57.00 €, fronte a outras veleidades no PSOE como o pintado do espigón”.  

 Dende o BNG, consideran “un despropósito o que o grupo de goberno lle chama proxecto en 3 fases, vai quedar en tres tramos de escasos 100 m. cada un deles, que empeza no número 1 da rúa e chega ata a praza de San Caetano. Sorprendentemente o alcalde esquécese por completo de máis da metade da rúa restante, que vai dende a canteira ata a estrada de circunvalación“.  

 “O alcalde da Guarda esquécese que hai unha serie de veciños e veciñas con serios problemas de vías de auga nos seus baixos froito do estado da rúa. Estas persoas non se merecen deste trato por parte do alcalde”, afirma o portavoz municipal do BNG no Concello de A Guarda.  

Falta de transparencia do Alcalde da Guarda  

 Ángel Luis Baz relembra que “o BNG presentou un escrito solicitando aclaracións sobre o proxecto a desenvolver e copia do mesmo para poder ser analizado. Para sorpresa do grupo municipal do BNG, non houbo contestación á petición da copia, polo que comezan a xurdir moitas dúbidas sobre que se pretende facer na rúa San Caetano”.  

 “O BNG deixou claro no acto celebrado onte diante dos veciños e veciñas da Cruzada a súa total desconformidade a como está levando o goberno municipal o desenvolvemento deste proxecto. Xa que atrasaron o proxecto, ben poderían ter incluído na primeira fase o conxunto de dous anos. Isto cando menos, adiantaría as obras nun ano, obras que levan tempo esperando os veciños e veciñas de San Caetano”, sinalou finalmente Ángel Luis Baz Vicente