15 de xuño de 2018

EMPREGO

A XUNTA DE GALICIA APOIA CON CASE 272.500 EUROS A CONTRATACIÓN DE 27 PERCEPTORES DA RISGA NOS 5 CONCELLOS DO BAIXO MIÑO  

· O delegado territorial da Xunta en Pontevedra, José Manuel Cores Tourís, destacou que terán preferencia as persoas que teñan asignado un proxecto de inserción de carácter laboral, as que teñan cargas familiares e os maiores de 45 anos 

· O importe medio da axuda concedida por traballador é de 8.750 euros  

· A Consellería de Economía, Emprego e Industria investirá na provincia un total de 2,1 millóns de euros para a contratación de 226 desempregados  

José Manuel Cores Tourís, delegado territorial da Xunta en Pontevedra

Infogauda / O Baixo Miño

 O Goberno galego apoiará aos 5 concellos da comarca do Baixo Miño coa contratación de 27 perceptores da Renda de Integración Social de Galicia (RISGA). Para iso, investirá ao redor de 272.500 euros.   

 Tal e como explicou o delegado territorial da Xunta en Pontevedra, José Manuel Cores Tourís, estas axudas están dirixidas a concellos ou agrupacións de concellos coas que, ademais de promover a contratación na Administración local, búscase incrementar as oportunidades laborais das persoas en risco de exclusión social.   

 O importe medio da axuda concedida por traballador é de 8747 euros, case un 4% máis que o ano pasado. Na contratación terán preferencia, ao igual que nas últimas dúas edicións deste programa, aquelas persoas que teñan asignado un proxecto de inserción de carácter laboral, os maiores de 45 anos e as que teñan cargas familiares.   

 Na comarca do Baixo Miño, beneficiaranse 10 desempregados de Tui, que contará cunha subvención de 103.260 euros; 5 de Tomiño, 5 do Rosal e 5 da Guarda, con 51.723, 52.095 e 48.502 euros, respectivamente; e 2 de Oia, con 16.774 euros. 

 José Manuel Cores Tourís engadiu que "a Xunta ampliará nas próximas semanas o crédito para esta convocatoria de axudas co obxectivo de poder atender todas as solicitudes que cumpran cos requisitos”. Segundo os baremos que se marcan na orde, cada concello pode solicitar un mínimo de 2 traballadores e un máximo de 40. A nivel provincial, a Consellería de Economía, Emprego e Industria investirá, a través destas axudas, un total de 2,1 millóns de euros para a contratación de 226 desempregados.  

 Con independencia da duración do contrato, o período que financiará a Xunta con estes apoios será de sete meses. A contía que se conceda será a equivalente ao necesario para sufragar os custes salariais totais, incluída a cotización empresarial á Seguridade Social por todos os conceptos, na mesma cantidade que a fixada para o salario, segundo o convenio colectivo vixente. Para a resolución das axudas tívose en conta o número de desempregados, a evolución do paro entre 2013 e 2017 de cada localidade e da poboación neste período e o número de perceptores da Risga a peche do ano pasado.  

 A iniciativa enmárcase na aposta da Xunta polo emprego inclusivo, un eido que está impulsando a través de diversos programas. A Administración autonómica, ademais de mellorar a empregabilidade e inserción laboral dos galegos e galegas que máis o precisan, fomenta a contratación nos concellos galegos.   

 Así, a Consellería de Economía, Emprego e Industria está a investir este ano preto de 60 millóns de euros para impulsar o emprego na Administración local a través de programas como o Aprol Rural, os apoios para a contratación de socorristas, os obradoiros duais e os específicos para a mocidade e os programas integrados de emprego.   

 A actuación tamén forma parte da Axenda 20 coa que a Xunta busca fomentar a calidade no mercado de traballo e coa que se está contribuíndo á redución do paro en Galicia e á creación de emprego.

Ningún comentario:

Publicar un comentario