A GUARDA

A GUARDA PECHOU O ENTROIDO 2017 CO SEU DESFILE-CONCURSO

O pasado día 4 de marzo, Sábado de Piñata

Participantes no desfile-concurso do Entroido, 2017 polas rúas da vila de A Guarda

Fotos: C. A. G.

Infogauda / A Guarda

 O Entroido 2017 xa é historia. En todo caso, compre relembrar como foi seu desenvolvemento na vila de A Guarda. E para elo compre decir que dende o venres día 24 de febreiro as rúas da Guarda enchéronse de cores, disfraces, música e moita troula. A saída do Entroido 2017 a puxo o “Entroido dos coles” o venres pola mañá, cos alumnos dos centros escolares da vila como protagonistas.   

 Estes realizaron un desfile polas rúas da Guarda para amosar os seus disfraces a tódolos veciños. O desfile comezou na Alameda e percorreu a rúa de Galicia ata chegar á Esquina do Galo. Puidéronse ver traxes en homenaxe a diferentes artistas como Dalí ou Velázquez, pescadoras/os cos seus produtos do mar, disfraces inspirados en 'Charlie e a fábrica de chocolate' e unha gran variedade de froitos da horta como millo, patacas, cenorias, tomates,  etc., xunto aos granxeiros, entre outros.  

 Ó día seguinte, sábado 25, celebrouse o “Sábado da mocidade”. Este incluíu a proxección do filme Vicky El Vikingo, pola tarde no centro Cultural e pola noite, na Carpa da Alameda tivo lugar unha velada moi especial. Primeiro co concerto do grupo pontevedrés Gold and Colt, tras o cal chegou pasadas a 1 da madrugada a gran novidade deste ano: o primeiro Concurso Drag Queen Guardés. En total houbo dez participantes e os gañadores foron: La Paca de Fornelos y sus secuaces, Pedroches II e Mikaela. Ó rematar o concurso, seguiu a troula coa “Festa hortera” a cargo de DJ Celig.  

 Tamén o domingo 26 houbo moita música polo “Día das familias” a cargo da orquestra Carambola, na Carpa da Alameda ás 18 horas. Xa o luns de carnaval os nenos e nenas guardeses volveron a ser o centro da festa con varias actividades adicados a eles. Pola mañá, na Biblioteca Municipal realizouse un Obradoiro de Máscaras e Pintacaras. Pola tarde, ás 18 horas na Carpa da Alameda, puideron desfrutar da divertida actuación do Trío Refugallo, comprobando como se pode facer música con calquera obxecto. A partir das 19 horas a festa continuou da man do Grupo La Tingana.  

 E para rematar o entroido guardés por todo o alto, o martes 28 estaba programada a celebración do Desfile-concurso de carrozas e comparsas. O mal tempo fixo que fora aprazado ata o sábado 4 de marzo día no que, esta vez si, os participantes puideron tomar as rúas da Guarda e enchelas de monxas, vikingos, artistas de circo, bolboretas e decenas de traballados disfraces. Tras o desfile foron anunciados os gañadores dos premios do Concurso. O primeiro premio da categoría de carrozas, dotado con 250 €, foi para a carroza 'África' de Ana Pereira Castro. O segundo posto, cun premio de 150€, foi para 'O xardín encantado' da Asociación Studio 88. 

Vista parcial da compa6rsa 'O xardín encantado' da Asociación Studio 88

 Na categoría de comparsas o primeiro e segundo posto, cun premio da mesma contía  que na categoría de carrozas, foron a parar a 'Duendeoiavai' do Club As Lebres, de Oia e a 'Felicidade dos maiores', do Club da 3ª Idade, respectivamente. A categoría de grupos quedou deserta. 

Participantes da carroza 'África' 

Na modalidade individual, na categoría xuvenil-adulto, o primeiro premio de 90€ foi para o disfraz 'La última guerrera'. En segundo posto quedou Publio Quintili Varo, cun premio de 70 €, e en terceiro lugar, con 50€, 'GO – GO'. Na categoría infantil o primeiro premio, de 90€, foi para 'El pirata y su tesoro'. En segundo lugar, os 70€ foron ás mans do disfraz 'Arabia Saudí' e os 50€ do terceiro os recibiu 'Chino Taxi'. En cuarto posto, con 30€, quedou a 'Bailarina rusa' e coa mesma dotación económica recibiron o quinto premio 'Os piratas da Cunchada' e o sexto 'Alicia e a Reina de corazóns'.  

Na imaxe, algúns dos disfraces premiados e o fondo membros do xurado

 Coa celebración do desfile e da festa do Sábado de Piñata a partir da medianoite, rematou o sábado 4 de marzo un entroido cargado de actividades e festa do que os veciños e veciñas conseguiron despedirse por todo o alto, vencendo incluso á choiva.