A GUARDA

A CONCELLERÍA DE CULTURA DA GUARDA PROMOVE Á INICIATIVA “DECORA O TEU NADAL”  

Ás asociacións e comisións de festas da Guarda están convidadas a participar no programa  

Elena Baz Rodríguez, concelleira de Cultura do Concello de A Guarda

Foto: Ricardo Rodríguez Vicente

Infogauda / A Guarda

 Tal e como comunicou a Concellería de Cultura da Guarda a asociacións deportivas, culturais, sociais e comisións de festas; o Departamento de Cultura ven de convocalos a participar no programa “Decora o teu Nadal”.  

 “Con esta iniciativa búscase - tal e como avanzou Elena Baz Rodríguez, concelleira de Cultura - potenciar a participación das asociacións da vila, dándolles visibilidade e protagonismo na organización e decoración urbana deste Nadal 2016.  Con este obxectivo nace unha iniciativa que leva como tema o “Decorado Urbano de Nadal”. Pode participar calquera asociación que sexa da Guarda, cun máximo de 1 proposta á que se lle outorgará un lugar para dita decoración, que será identificado co nome da mesma. Os materiais serán preferiblemente de refugallo, non contaminantes e resistentes ás condicións meteorolóxicas do exterior. Ademais, como novidade, o Concello da Guarda outorgará unha axuda económica para a adquisición do material de ser necesario”.  

 O prazo que terán as asociacións participantes para realizar as decoracións será do día 9 ao 18. O día 19 de decembro faranse públicos na páxina web do Concello da Guarda tódolos decorados.  

 Para confirmar a súa participación as asociacións deben facelo antes do vindeiro 29 de outubro. Dende o Concello da Guarda deséxase que esta sexa unha iniciativa de interese para todos e que axude a facer entender A Guarda como un espazo de expresión artística, no que todos poden participar no embelecemento da vila.