CAMPOSANCOS

O BNG presenta unha moción para regular os plenos da Entidade Menor de Camposancos  

Merchi Martínez: “Camposancos ten dereito a saber cando se celebran os seus plenos, trátase de achegar a institución ao pobo”  

María Mercedes Martínez Vázquez (Merchi), vogal do BNG na Entidade Local Menor de Camposancos e concelleira na Corporación Municipal do Concello de A Guarda

Infogauda / Camposancos 

 O Bloque Nacionalista Galego presentou unha moción “para o estabelecemento dun calendario de plenos da Entidade Local Menor de Camposancos”.  

 O BNG lembra que “o pleno é un dos órganos de funcionamento da Entidade Local Menor; é o momento, o lugar onde os representantes dos veciños e veciñas tratan todos aqueles asuntos, situacións ou problemáticas que afectan ao pobo de Camposancos”.  

 “Dende o BNG vemos como non existe ningún tipo de criterio que rexa a celebración dos plenos desta entidade, chegando a haber unha descoordinación entre a Entidade Menor de Camposancos e o Concello da Guarda facendo coincidir os plenos”. Os nacionalistas sinalan que “ámbalas dúas entidades están gobernadas polo PSOE”. 

 “Trátase facer unha institución máis aberta para os veciños e veciñas, sen limitar a participación na vida política de Camposancos e da Guarda, queremos que calquera poida explicar os seus problemas directamente no pleno”, afirmou Mª Mercedes Martínez Vázquez (Merchi), vogal do BNG na Entidade Menor de Camposancos.  

 Segundo a formación nacionalista “é difícil de entender que a estas alturas a Entidade Menor de Camposancos non ten un regulamento de funcionamento, deixando á improvisación do alcalde pedáneo de turno”.  

 Asemade, “o BNG propón regular tanto os períodos de celebración de plenos, o número de plenos , así como a estrutura de funcionamento, quendas de intervención, a posibilidade de que veciños e veciñas tamén poidan intervir para amosar os seus problemas”.