A GUARDA

O Concello de A Guarda e a Entidade Menor de Camposancos estudan a rehabilitación medioambiental e paisaxística do Campo do Codesal  

Ambos gobernos apostan por estas obras que serían a primeira fase dun proxecto moito máis ambicioso  

O alcalde de A Guarda, Antonio Lomba Baz - a dereita da imaxe -, e o concelleiro de Medio Ambiente, Paulino Rodríguez González - no centro -, con Rafael Álvarez Martínez, presidente da Entidade Local Menor de Camposancos. no Campo do Codesal

Fotos: C.A.G.

Infogauda / A Guarda

 O alcalde de A Guarda, Antonio Lomba Baz, e o concelleiro de Medio Ambiente, Paulino Rodríguez González, reuníronse nestes días co presidente da Entidade Menor de Camposancos, Rafael Álvarez Martínez, "para estudar un proxecto de rehabilitación medioambiental e paisaxística do Campo do Codesal".  

 Desde o executivo municipal afirman que "nesta obra o que se pretende facer é derrubar todo o muro de pedra que rodea o campo e demoler as instalacións para poder crear unha zona de esparcimento que desfrutarían tanto os veciños e veciñas guardeses e camposinos coma os visitantes que chegan á vila durante os meses de verán.  

 Nas obras tamén se contempla a construción dun cercado de madeira para delimitar a zona e impedir que entren os vehículos".  

Primeira fase  

 "Esta rehabilitación medioambiental e paisaxística do Campo do Codesal sería - tal e como comentaron Antonio Lomba e Rafael Álvarez -, a primeira fase dun proxecto moito maior e máis ambicioso.  

 Así, coa axuda doutras entidades o que se busca e rehabilitar tamén a zona de A Lamiña e conseguir unha zona de esparcemento e deportiva para o uso dos veciños e visitantes".