A CORUÑA

Medio Ambiente aposta pola erradicación temperá das especies exóticas invasoras e pola súa contención en zonas prioritarias 

A directora xeral de Conservación da Natureza, Ana María Díaz, participou hoxe na Coruña nunha xornada organizada por Adega sobre esta materia

Carpobritus edulis (unlla de gato), unha das especies vexetais exóticas invasoras

Infogauda / A Coruña

 A Consellería de Medio Ambiente ten fixado entre os seus obxectivos a erradicación de especies exóticas invasoras, para o que está a traballar nunha programación centrada en dous eixos de actuación: a eliminación temperá de focos de invasión de especies animais e vexetais de alto risco recentemente naturalizados; e o control e contención local en lugares prioritarios para a conservación de especies autóctonas, como pode ser a Rede Natura 2000.  

 Así o salientou hoxe a directora xeral de Conservación da Natureza, Ana María Díaz, durante a súa participación na Coruña na xornada “Especies exóticas invasoras e participación social”, que organiza Adega.  

 Na súa intervención, a responsable autonómica insistiu na importancia de facer fronte ás especies exóticas invasoras, en tanto constitúen a segunda causa de extinción de especies e o segundo problema ambiental que afecta á biosfera a escala global, só por detrás da perda e destrución de hábitats.  

 Precisamente por esta razón, as autoridades están impulsando a súa acción na materia. Como exemplo, citou que recentemente téñense aprobado distintas normas, tanto no ámbito estatal como no europeo, co obxectivo de previr, reducir ao máximo e mitigar os efectos adversos destas especies.  

 Díaz López recordou tamén que o departamento autonómico asinou durante 2015 un convenio con Adega, que tivo como principal obxectivo desenvolver un programa de educación ambiental centrado na conservación de especies e hábitats da xeografía galega e na loita contra as especies exóticas invasoras.