TUI

Máis de 300 persoas activan corpo e mente grazas a dous programas promovidos polo Concello de Tui  

• Cultiva a Mente e Coida o Corpo desenvólvense en todas as parroquias tudenses 

 

A ribeira de Caldelas acolleu onte a clausura da temporada 2025/2026 dos programas Cultiva a Mente e Coida o Corpo promovidos polo Concello de Tui e impartidos por AFAGA

Foto:CT

Infogauda/Tui

 Un total de 345 persoas beneficiáronse esta temporada dos programas Cultiva a Mente e Coida o Corpo promovidos polo Concello de Tui e impartidos pola Asociación de Familiares de Enfermos de Alzheimer e Outras Demencias de Galicia (AFAGA). Estes dous proxectos promoven o envellecemento activo e saudable das persoas maiores de 55 anos, impulsan espazos de socialización e fomentan a súa autoestima. Realízanse en todas as parroquias de Tui: Areas, Baldráns, Caldelas de Miño, Guillarei, Malvas, Paramos, Pazos de Reis, Pesegueiro, Randufe, Rebordáns e Ribadelouro.   

 A ribeira de Caldelas acolleu onte a clausura da temporada 2025/2026 destes programas. No acto participaron o alcalde, Enrique Cabaleiro, o concelleiro de Servizos Sociais, Ismael Diz, e o presidente de AFAGA, Juan Carlos Rodríguez, xunto ás persoas técnicas que imparten cada un dos programas e os e as usuarias tanto de Cultiva a Mente coma de Coida o corpo.   

 Neste acto o alcalde, Enrique Cabaleiro, confirmou a continuidade deste dous programas a partir do mes de setembro. Afirmou que seguirán “dedicando recursos para as persoas, para as persoas maiores, para as persoas que vivides no rural. Iso é o prioritario”.    

 Pola súa banda, o concelleiro de Servizos Sociais, Ismael Diz, lembrou que en 2019 o Concello de Tui puxo en marcha en seis parroquias o programa Cultiva a Mente, que progresivamente se foi estendendo até impartirse en todas as parroquias. Ao mesmo sumouse o programa Coida o Corpo, xa na totalidade das parroquias tudenses.  

 Juan Carlos Rodríguez, presidente de AFAGA, Asociación de Familiares de Enfermos de Alzheimer e outras demencias de Galicia, remarcou que os dous programas que se desenvolven en Tui, son exemplos para toda a provincia de Pontevedra. Repasou as actividades que AFAGA desenvolve en Tui dende estes dous programa de prevención, ao centro de recursos que teñen en Randufe, e os programa formativos para persoas coidadoras que levan a cabo.   

 Esta temporada no programa Cultiva a Mente, pioneiro en promocionar o envellecemento activo e saudable a través de actividades de índole cognitivo, psicolóxico e social, teñen participado 183 persoas, cunha idade media de 75 aos, das que o 80% son mulleres. Ao longo do curso amais de promover hábitos saudables, ou abordar o funcionamento do cerebro, tamén levaron a cabo proxectos interxeneracionais co alumando do CEIP nº1, do CEIP de Guillarei e do CEIP de Randufe, e realizaron unha excursión aos Canóns do Sil.   

 O programa Coida o Corpo promove un estilo de vida activo e saudable contribuíndo á prevención do deterioro físico e funcional das persoas participantes. Este curso contou coa participación de 177 persoas cunha idade media de 73 anos, e das que o 82% foron mulleres. Entre as actividades complementarias que realizaron á sesión semanal do programa hai unha semanas realizaron as Olimpíadas Senior na Ribeira de Caldelas.   

 O Concello de Tui continúa co seu compromiso no eido social apostando pola continuidade deste dous programas dirixidos a persoas maiores de 55 anos de todas as parroquias tudenses.