A GUARDA

O BNG celebrou un acto sobre sanidade na Guarda  

Ángel Luis Baz Vicente (portavoz nacionalista no Concello de A Guarda): “A ambición do PP por beneficiar aos seus coa privatización dos servizos sanitarios pon en perigo a poboación”  

Manuel Moreira - a esquerda -, médico e membro da plataforma SOS Sanidade Pública de Vigo, e Ángel Luis Baz Vicente, portavoz do BNG no Concello de A Guarda

Infogauda / A Guarda

 O Bloque Nacionalista Galego realizou un acto sobre as consecuencias do modelo do PP de privatización da sanidade que segundo os nacionalistas “ten o seu máximo expoñente no novo hospital Álvaro Cunqueiro”.  

 O acto foi presentado polo portavoz municipal do BNG, Ángel Luis Baz Vicente, que agradeceu “o comportamento do pobo da Guarda na última manifestación celebrada en Vigo”. Asemade, deixou claro “o compromiso do BNG coa sanidade pública na Guarda”.  

 “O BNG traballou e traballa pola mellora dos nosos servizos sanitarios, aí están as campañas que levamos anos realizando: pola mellora do servizo de urxencias, do servizo de pediatría, reclamación do servizo de radioloxía, así como a petición dunha ambulancia medicalizada”, dixo o portavoz municipal nacionalista.  

 Mentres, Manuel Moreira, médico e membro da plataforma SOS Sanidade Pública de Vigo, detallou a gran operación de “privatización” levada a cabo na área sanitaria de Vigo que ten como vértice o novo hospital Álvaro Cunqueiro de Vigo. 

 “Feijoo minte: tiñamos un hospital público cun orzamento de 450 millóns de € e agora temos que pagar a unha empresa privada 1.300 millóns por un hospital máis pequeno e peor dotado”, afirmou Manuel Moreira.
  

Ángel Luis Baz Vicente, Manuel Moreira, Merche Martínez e Xan Lois Lomba Alonso

 O acto rematou cun coloquio no que segundo se puido amosar “a preocupación existente pola actual situación de caos que se vive no novo hospital de Vigo, así como pola política de privatizacións que está a levar o PP que sitúa entre os beneficiarios de dita privatización a membros e ex-altos cargos do Partido Popular”.