LABORAL

A DEPUTACIÓN DE PONTEVEDRA CONVOCA 30 BOLSAS DE PRÁCTICA LABORAL EN EMPRESAS DO SECTOR TURÍSTICO

Están destinadas titulados universitarios ou de ciclos formativos sen experiencia previa neste ámbito

·        Ofértanse prazas para titulados en Xestión de Eventos, Dirección de Cociña, Xestión de Aloxamentos Turísticos e Dirección de Servizos de Restauración, entre outras

·        Os interesados disporán de 8 días naturais para presentar as súas solicitudes

A Deputación de Pontevedra convoca 30 bolsas de práctica laboral en empresas do sector turístico, destinadas a mozas e mozos titulados universitarios ou de ciclos superiores de formación profesional sen experiencia previa.

Así se recolle no Boletín Oficial da Provincia de hoxe, onde se establece un prazo de 8 días naturais, contados a partir de mañá, para que os interesados poidan presentar as súas solicitudes.

As bolsas serán de 3 meses de duración prorrogables por outros tres e, en casos excepcionais, poderán ampliarse ata un ano. A dotación económica será de 800 euros para o caso dos titulados universitarios e de 700 para os de ciclos superiores.

En todo caso, para poder aspirar a estas bolsas, ademais da titulación requirida, será necesario estar empadroado nalgún dos concellos da provincia de Pontevedra, contar cun certificado acreditativo do coñecemento da lingua galega nivel Celga IV ou Celga III e non ter sido beneficiario anteriormente das bolsas de práctica laboral da Deputación.

Titulacións ofertadas

As 30 prazas distribúense en 7 titulacións diferentes.

Así, ofértanse 9 prazas para a diplomatura ou grao en Turismo ou en Empresas e Actividades Turísticas, que poderán desenvolver as súas prácticas en empresas de Meaño (2), Sanxenxo (2), Vigo (2), Caldas de Reis (1), Meis (1), O Grove (1). Outras 6 bolsas van destinadas a titulados de ciclo superior en axencias de Viaxes e Xestión de Eventos, que poderán traballar en empresas de Lalín, Ponteareas, Pontevedra, Silleda, Vilagarcía de Arousa ou Vigo; mentres que outros seis titulados en Dirección de Cociña (ciclo superior) son demandados para empresas de Pontevedra (2), Caldas de Reis, Marín, Moaña e Vila de Cruces.

Unha empresa de Agolada acollerá un titulado de ciclo superior en Dirección de Servizos de restauración, mentres que Sanxenxo será o destino de quen resulte beneficiario da bolsa para titulados en Organización do Mantemento da Maquinatia de Buques e Embarcacións.

Así mesmo, ofértanse 5 prazas para ciclo superior en Xestión de Aloxamentos Turísticos, con destino, 3 deles, en empresas de O Grove, un en A Estrada e outro en Poio.

Finalmente, unha empresa de Meaño e outra de Vilagarcía de Arousa recibirán cadanseu bolseiro cunha titulación de ciclo superior en Guía, Información e Asistencia Turística.