PONTEVEDRA

DESDE 2009, OS CONCELLOS ADHERIDOS AO ORAL INGRESARON 13,3 MILLÓNS DE € POLO IBI DE PARQUES EÓLICOS E OUTROS BENS DE CARACTERÍSTICAS ESPECIAIS

En 2013, os ingresos por este concepto ascenderon a 3,3 millóns de euros

Desde que a Xustiza dera a razón á Fegamp na batalla liderada por Xosé Crespo para que os parques eólicos tributasen como Bens de Características Especiais (BICES), os 36 concellos adheridos ao ORAL ingresaron un total de 13,3 millóns de euros polo IBI destas instalacións, minicentrais, autoestradas e outros BICES.

Así o puxo de manifesto esta mañá o presidente da Deputación de Pontevedra, que destacou o notable incremento da recadación que para varios concellos da provincia supuxo este cambio na tributación dos parques eólicos e as súas instalacións.

Un exemplo claro do aumento dos ingresos percíbese ao comparar a recadación polo IBI dos BICES en 2009, primeiro ano no que os parques eólicos tributaron como tales, e o exercicio anterior. Así, en 2009 os 36 concellos adheridos ao ORAL acadaron uns ingresos de 2,2 millóns de euros, fronte ao 1,4 millóns do ano anterior.

Esta contía non deixou de medrar nos últimos anos como consecuencia da incorporación de novos inmobles e da actualización de taxas. Así, en 2013 o ORAL recadou polos 125 bens de características especiais existentes no seu territorio, un total de 3.351.000 €.

A comarca do Deza é a que maiores ingresos recibe por este concepto, debido á concentración de parques eólicos nesta zona. Así, Lalín, con 4 parques eólicos no seu termo municipal, 75 aeroxeradores e unha potencia instalada de 55,37 megawatios, superou no último lustro os 2,6 millóns de euros de ingresos.

Seguíronlle en recadación Silleda, con 1,6 millóns de euros, Baiona con 845.428 euros, A Estrada  con preto de 695.000 euros e Vila de Cruces con 606.000.

6,7 millóns de ingresos en Deza e Tabeirós

Nos oito concellos de Deza e Tabeirós-Terra de Montes que teñen delegada no ORAL a xestión tributaria, a recadación por bens inmobles de características especiais acadou no período 2009-2013 a cifra máis elevada de toda a provincia, con 6,7 millóns de euros, dos cales 1,2 corresponden ao pasado ano.

CONCELLO	importe 2013	2009-2013
Agolada	66.238,55	309.607,49
Cerdedo	32.639,56	162.381,65
Dozón	48.210,38	305.108,33
A Estrada	111.167,14	694.839,32
Lalín	457.250,72	2.639.080,09
Rodeiro	118.800,42	431.813,13
Silleda	268.330,19	1.602.243,07
Vila de Cruces	134.829,35	606.362,97
Totales	1.237.466,31	6.751.436,05

O Condado-Paradanta

As comarcas do Condado e A Paradanta concentran boa parte dos aeroxeneradores do sur da provincia e, en consecuencia, tamén rexistraron notables ingresos coa tributación dos parques eólicos como BICES, acadando un total de máis de 1,5 millóns de euros nos 5 últimos anos.

Varios destes concellos, como é o caso de O Covelo, non tiñan ata 2009 ningún ingreso por este concepto, ao non estar recoñecidos os parques eólicos como tales.

Así, este concello pasou de ingresar 0 euros en 2008 a máis de 63.000 en 2009 polos dous parques eólicos activos naquel momento e os case 116.000 euros de 2013, xa con 4 parques en marcha (Bidueiros, Deva, Tea e Fonteavia).

Na mesma situación estaban Arbo, A Cañiza e As Neves, que cobraron por primeira vez IBI de BICES.

Neste caso, A Cañiza ingresou no período 2009-2013 un total de 448.461 euros polos muíños e instalacións eólicas dos parques de Deva e Montouto 2000 situadas no seu termo municipal; Arbo ingresou algo máis de 156.000 euros tamén por dous parques eólicos (Singular de Arbo e Montouto 2000) e As Neves, con muíños e instalacións correspondentes a outros dous parques, percibiu 197.875 euros.

CONCELLO	importe 2013	2009-2013
Arbo	32.768,06	156.399,81
A Cañiza	94.032,15	448.461,02
O Covelo	115.745,40	552.016,56
Crecente	36.037,15	179.828,95
As Neves	42.438,64	197.875,71
TOTAL	321.021,40	1.534.582,05

Caldas e Arousa

No caso dos concellos de Caldas e Arousa adheridos ao Oral, os ingresos por Bens Inmobles de Características Especiais acadaron os 668.000 euros, sendo os municipios de Caldas, Catoira e Cuntis –nos que se asentan os aeroxeradores do parque eólico de Monte Xiabre- os que maiores ingresos recibiron.

CONCELLO	importe 2013	2009-2013
Caldas de Reis	11.367,37	270.768,40
Catoira	30.068,96	143.405,83
Cuntis	13.703,78	127.717,56
Meis	193,07	548,63
Moraña	3.143,00	20.851,21
Portas	9.692,00	43.196,94
Valga	9.267,25	46.244,49
Pontecesures	3552,45	15833,16
TOTAL	80.987,88	668.566,22

Autoestradas no Val Miñor e portos no Morrazo

Segundo o balance presentado esta mañá polo presidente da Deputación, destaca o recadado polos tres concellos do Val Miñor, que conforman a segunda área con maiores ingresos polo IBI de BICES en toda a provincia, dado que alcanzan os 2.345.000 euros nos cinco últimos anos.

No entanto, neste caso a recadación non obedece ao peso da eólica, senón a ser un nó de comunicación polo que pasan autoestradas, que tamén tributan como BICES. Desta forma, a recadación é moi similar en Baiona, Gondomar e Nigrán e en 2013 superou os 470.000 euros.

CONCELLO	importe 2013	2009-2013
Baiona	169.421,27 €	845428,92
Gondomar	147.596,64 €	736521,84
Nigrán	153.047,94 €	763724,38
TOTAL	470.065,85 €	2.345.675,14

Tamén no Morrazo a recadación obedece a un concepto diferente aos parques eólicos, e garda relación coa actividade económica dos portos. A recadación dos dous concellos desta comarca situouse en 718.000 euros.

CONCELLO	importe 2013	2009-2013
Cangas	31.474,49	211.923,92
Moaña	378,16	506.329,24
TOTAL	31.852,65	718.253,16

Finalmente, na comarca de Pontevedra, os ingresos por bens inmobles de características especiais alcanzaron os 770.000 euros e inclúen tanto parques eólicos (presentes, por exemplo, nos concellos de A Lama ou Cotobade)  como minicentrais (Ponte Caldelas, Cotobade, A Lama, Campo Lameiro…), autoestradas (Vilaboa e Barro) e outros BICES.

CONCELLO	importe 2013	2009-2013
Barro	9.383,09	41.820,14
Campo Lameiro	22.352,97	44.173,73
Cotobade	26.908,79	106.743,7
A Lama	61.915,72	333.479,32
Poio	1.699	7.572,39
Ponte Caldelas	22.373,97	111.648,32
Vilaboa	23.197,53	124.395,76
TOTAL	167.831,07	769.833,36