BAIXO MIÑO

As Plataformas de Afectados por Preferentes e Subordinadas de Galicia manifestaranse o sábado 1 de febreiro en Vigo. Reclamarán a devolución de 500 millóns de € a máis de 35.000 estafados

Baixo Miño, 29 de xaneiro de 2014

 

As Plataformas de Afectados por Preferentes e Subordinadas de Galicia convocan unha MANIFESTACIÓN que terá lugar o vindeiro sábado, 1 de febreiro en Vigo. A manifestación partirá ás 11:00 h. desde o cruce da rúa Aragón coa rúa Urzaiz, e rematará na Porta do Sol.

O 18 de febreiro de 2013 o goberno español presidido por Mariano Rajoy, a través do FROB, fixo que Galiza perdera o control definitivo de NovaGalicaBanco, principal entidade financeira que quedaba en pé e que xestiona o 40% do aforro dos galegos e galegas, entregando a entidade a un pequeno banco venezolano pola irrisoria cantidade de 1.000 millóns de euros a pagar en cómodos prazos de aquí a 2018.

Hai ano e medio, o presidente da Xunta, o Sr. Feijóo afirmaba que se ía buscar unha solución para as preferentes e subordinadas, pero hoxe o problema está sen solucionar porque, lembramos novamente, faltan por devolver 500 millóns a 35.000 persoas. En todo este tempo o Sr. Feijóo nin tan sequera se dignou recibir unha representación das plataformas. Resulta indignante a irresponsabilidade do presidente da Xunta que se declara “tranquilo e satisfeito polo desenlace” da venda do banco.

Agora que a venda-agasallo está consumada, queremos dirixirnos aos actuais donos de NovaGaliciaBanco (o FROB e o Ministerio de Economía), e aos futuros directivos de BANESCO: vostedes compraron un banco, pero tamén compraron un problema: ese problema somos nós, os estafados coas preferentes e subordinadas. SOMOS UN PROBLEMA porque imos seguir loitando, porque a razón está da nosa parte e porque conseguimos grandes vitorias, pero non imos parar até a vitoria final que será a recuperación total de todo o noso diñeiro.

NON PARAREMOS ATA QUE COBREMOS
NON IMOS PARAR ATA OS CARTOS RECUPERAR

Con estas consignas chegamos aos concellos, ás deputacións, ao parlamento galego, ao parlamento español, á Defensora del Pueblo, ao Valedor do Pobo e á Comisión Europea…

Lamentamos que nestes días o Conselleiro de Economía e Industria, Francisco Conde, rexeitara unha entrevista que lle tiñamos solicitada coa escusa de ter a axenda moi ocupada e que o Vicepresidente e Conselleiro de Xustiza, Alfonso Rueda, non se dignara a contestarnos ante a mesma solicitude de reunión. O mesmo que fixo o Sr. Feijóo desde fai ano e medio. E o Ministro de Guindos tampouco tivo a ben recibirnos.

E a día de hoxe aínda non se dignou a contestar o Presidente de Banesco, Sr. Escotet, e non nos fiamos das súas promesas, nin a 90 días, nin a un mes, nin a nada, entre outras cousas porque o control do Consello de Administración de NGB está en mans do FROB e o Ministerio de Economía.

Recordamos que as demandas xudiciais son única vía aberta para os estafados, despois de ser abandonados á súa sorte polas administracións públicas tralo proceso de canxe e quitas obrigatorias e o remate da arbitraxe, e que están a resultar maioritariamente favorabeis aos afectados.

E esiximos tamén a retirada ou arquivo de todas as multas e sancións administrativas aos membros de plataformas na súa loita exemplar pola devolución do 100% dos seus aforros.

Queremos a solución e querémola xa: DEVOLUCIÓN ÍNTEGRA E TOTAL DO NOSOS AFORROS!!!

Gustaríanos que esta fose a última vez que tivésemos que mobilizarnos, pero sospeitamos que non vai ser así. Por tanto, seguiremos, seguiremos e seguiremos e NON PARAREMOS ATA QUE COBREMOS!!!

Desde a Plataforma de Compostela e comarca facemos un chamamento aos distintoscolectivos cidadáns e movementos sociais, sindicatos e partidos políticos que se veñen mobilizando nos últimos meses contra os recortes sociais e de dereitos impulsados polas políticas de “austeridade” dos gobernos do Partido Popular, para que participen na manifestación e apoien as reivindicacións do colectivo de estafados polas entidades financieiras.

Plataforma de afectados por preferentes e subordinadas do Baixo Miño

(R.)