PONTEVEDRA

O pleno da Deputación aprobou por unanimidade o regulamento do servizo

O SERVIZO PROVINCIAL DE RECOLLIDA DE ANIMAIS COMEZARÁ A FUNCIONAR EN MARZO, CON PRETO DE 50 CONCELLOS ADHERIDOS

·       O ministerio de Agricultura autorizou un convenio coa Deputación para que a empresa Tragsa leve a cabo a xestión inicial deste servizo

·       O servizo suporá un custe de 250.000 euros para unha poboación de 378.771 habitantes

·       Os concellos aboarán polo servizo 30 céntimos por habitante e ano e a Deputación cubrirá os restantes 36 céntimos

O pleno da corporación provincial aprobou hoxe por unanimidade o regulamento do servizo de lacería e do centro de acollida e protección de animais de Armenteira, que entrará en funcionamento o vindeiro mes de marzo e prestará servizo inicialmente a 47 concellos que xa se adheriron ao mesmo.

A empresa Tragsa será a encargada da xestión inicial deste servizo provincial de recollida de animais, despois de que o Ministerio de Agricultura, Alimentación e Medio ambiente autorizase a sinatura dun convenio coa Deputación para este fin.

O servizo suporá un custo anual de 250.000 euros e beneficiará a unha poboación de 378.771 habitantes, o que supón que o prezo que se deberá aboar polo mesmo é de 0,66 euros por habitante e ano.

O financiamento do servizo farase entre Deputación e concellos, de forma que os segundos deberán pagar 30 céntimos por habitante e ano (un total de 113.631,13 euros entre todos os concellos), e a Administración provincial cubrirá os 136.368,70 euros restante, achegando 0,36 euros por habitante e ano.

Isto suporá unha notable redución na achega que na actualidade teñen que facer os concellos para poder prestar este servizo, que é competencia municipal e que ata o de agora supoñía un verdadeiro problema para a maioría dos concellos da provincia.

Concienciación

O obxectivo do servizo provincial de recollida de animais é incidir na concienciación e sensibilización da poboación tanto a prol das adopcións como en contra dos abandonos, así como no máximo respecto ás necesidades, ao benestar e aos dereitos dos animais.

Neste sentido, a xestión do centro incluirá medidas de vixilancia para a identificación e rexistro de animais, programas de vacinación e esterilización, campañas para promover a tenza responsable de animais e de sensibilización para erradicar o abandono e os malos tratos, fomentando as adopcións sobre calquera outro destino e colaborando coas asociacións protectoras de animais.

Coa xestión conxunta do servizo búscase unha optimización dos recursos públicos e unha mellora na calidade da prestación, cun aforro que nalgúns casos chegará ao 70% respecto o que pagan na actualidade os concellos.

CONCELLOS ADHERIDOS Ó SERVIZO PROVINCIAL DE ACOLLIDA DE ANIMAIS DOMÉSTICOS ABANDONADOS

CONCELLO	Nº HABITANTES
AGOLADA	2.926
A ESTRADA	21.759
A LAMA	2.976
ARBO	3.741
BAIONA	12.258
BARRO	3.668
CAMPOLAMEIRO	2.036
CALDAS DE REIS	10.060
CAÑIZA	6.461
CATOIRA	3.489
CERDEDO	2.297
COTOBADE	4.432
COVELO	3.235
CRECENTE	2.533
CUNTIS	5.066
DOZÓN	1.744
FORCAREI	4.044
FORNELOS DE MONTES	2.002
GUARDA, A	10.484
GONDOMAR	13.973
GROVE	11.241
LALIN	21.127
MARIN	25.864
MEAÑO	5.444
MEIS	4.988
MONDARIZ	5.081
MONDARIZ-BALNEARIO	730
MORAÑA	4.398
MOS	14.942
NEVES, AS	4.400
NIGRAN	17.879
PAZOS DE BORBEN	3.192
PONTECALDELAS	6.319
PORTAS	3.070
REDONDELA	30.006
RIBADUMIA	5.107
RODEIRO	3.034
ROSAL	6.613
SALVATERRA DO MIÑO	9.546
SANXENXO****( Se adhieren cando finalicen o contrato coa actual empresa)	17.586
SILLEDA	9.199
SOUTOMAIOR	7.223
TOMIÑO	13.604
VALGA	6.103
VILABOA	6.024
VILA DE CRUCES	6.325
VILANOVA DE AROUSA	10.614
TOTAL: 47	378.771