PONTEVEDRA

A DEPUTACIÓN CONVOCA A I EDICIÓN DO CONCURSO DE CONTO INFANTIL ILUSTRADO EN LINGUA GALEGA

A Deputación de Pontevedra convoca a 1ª edición do concurso de conto infantil ilustrado en lingua galega Contando Historias.

O obxectivo do mesmo será  estimular e premiar a creación literaria e artística de todas aquelas persoas que, residindo en Galicia, queiran participar desta iniciativa; á vez, achegarlle o Museo de Pontevedra e as pezas que nel se conservan á cidadanía.

Dentro da iniciativa poderán participar nenos e adultos. Haberá unha categoría para creadores infantís na que poden participar todos os ciclos de primaria dos colexios da provincia e outra para creadores adultos (Poderán presentarse todas aquelas persoas residentes en Galicia maiores de 16 anos.

Os participantes deberán tecer, en lingua galega, unha historia novelada e ilustrada que terá como protagonista unha peza, unha colección, un personaxe ou un dos edificios do Museo. Os traballos deberán presentarse no Rexistro Xeral da Deputación ata o 30 de novembro de 2012.  Os premios:

11.     Concurso Infantil:

·       A publicación conxunta dos tres contos gañadores, un de cada categoría, que serán distribuídos pola Deputación.

·   O colexio dos gañadores recibirá un premio por importe de 500 euros, que deberá ser investido no material escolar.

  2.  Creadores adultos:

·        Primeiro premio: 1.000 €.

·        Segundo premio: 600€

·        Os contos publicaraos e distribuiraos a Deputación, e os autores premiados recibirán 10 copias do seu conto publicado.

Contos De Samaín Para A Ponte De Todos Os Santos

Aproveitando a celebración da festividade de Todos os Santos, relacionada co Samaín e próxima no tempo ó Magosto e a San Martiño, a Deputación desenvolverá, a través do Gabinete Didáctico do Museo, a proposta titulada “Contos de Samaín”.

A actividade celebrarase os días 1, 2 e 3 de novembro, dirixida a rapaces e rapazas de entre 5 e 8 anos.

A actividade consistirá na celebración de sesións de contacontos, complementadas cun obradoiro creativo. Con esta iniciativa de contacontos os máis pequenos poderán coñecer algunhas das tradicións relacionadas con estas datas e participarán a continuación nun obradoiro creativo complementario dos relatos.

A actividade desenvolverase na lareira do edificio “García Flórez” e as salas contiguas. Terá unha duración aproximada de 90 minutos, co seguinte calendario: o xoves, 1 de novembro, ás 12:00 h, e o venres, 2, e o sábado, 3, ás 18:00 h.

O número de participantes en cada sesión será, como máximo, de quince. Os interesados en inscribirse poderán facelo chamando ó teléfono 986 804 100, extensión 42413, ou no correo electrónico gabinetedidactico.museo@depo.es