Na primeira xuntanza da Comisión de alcaldes estableceuse o 1 de xaneiro de 2013 como data límite para a posta en marcha do servizo
· 58 camións, 134 traballadores e 15.000 contedores compoñen o servizo de recollida de lixo dos 35 concellos que contan con xestión directa
· Por cada 100 toneladas de embalaxes e envases correctamente separados, os concellos conseguen un aforro de 5.700 euros na taxa de recollida e uns ingresos adicionais de 15.000 euros
· A comisión está integrada por 15 alcaldes: 4 do PSOE, 2 do BNG e os restantes do PP
· Antes do verán presentaranse os datos finais da auditoría, sobre os que xa se poderán articular as rutas, distribución de contedores e organización do servizo
A Comisión de Alcaldes para o seguimento e impulso dunha “gran plataforma de servizos” conxuntos a nivel provincial comezou hoxe a súa andadura, cunha xuntanza na que se fixou o día 1 de xaneiro como data límite para a implantación da recollida provincial de lixo e na que se estableceu que a unificación do servizo non suporá un incremento das taxas.
Neste sentido, Rafael Louzán, que presidiu a reunión, incidiu en que, dada a gran disparidade de tarifas existente entre os distintos concellos da provincia, “a Deputación está disposta a axudar a regularizar esa situación para non gravar máis aos cidadáns”. Así, asegurou que, exceptuando aqueles concellos que teñen unhas taxas extremadamente baixas, como podería ser o caso de Gondomar, onde non se cobra, ou Arbo, onde a tarifa é de 15 euros, “a Deputación vai asumir un esforzo, se fose necesario, desde o punto de vista económico para harmonizar as tarifas e non gravar máis aos cidadáns”.
Esta cobertura do déficit do servizo por parte da Deputación faríase nos primeiros meses da súa posta en marcha, porque o obxectivo é que a xestión conxunta dea lugar a unha considerable redución do custe da prestación, o que suporía no curto e medio prazo eliminar o déficit chegando, incluso, a poder baixar o recibo.
15.000 euros de ingresos por 100 toneladas separadas
Ademais da redución dos recursos humanos e dos vehículos e dunha articulación máis eficiente das rutas, unha das vías que a Deputación e a Comisión de Alcaldes marcaron como camiño a seguir para conseguir abaratar o custe do servizo é o incremento da separación en orixe, que nestes momentos apenas supera o 8% do total de residuos xerados na provincia.
Por cada 100 toneladas de envases de plástico e embalaxes correctamente separados (bolsa amarela), afórranse 5.700 € na tarifa que se paga a Sogama e percíbense uns ingresos de 15.000 €.
Segundo os datos expostos polos técnicos na Comisión de Alcaldes, os 35 concellos que teñen xestión directa dos residuos –e que son os que inicialmente se poderían sumar ao servizo provincial– xeran anualmente un volume de 71.530 toneladas de residuos, das que só se separan 2.205,73 toneladas de envases e embalaxes; 2.376,65 toneladas de papel e cartón e 2.862,58 toneladas de vidro.
Separar este 9,7% supón abaratar o custe do servizo en 867.930 euros, dado que os concellos teñen que pagar así 426.785,16 euros menos a Sogama e reciben uns ingresos da empresa que recolle os residuos separados de 441.146 euros.
Por iso, tanto alcaldes como técnicos e o propio presidente da Deputación fixeron especial fincapé na necesidade de que o servizo leve consigo campañas de concienciación cidadá para incrementar a separación e mellorar a calidade do que se separa. Así, incidiuse en que as campañas hai que achegalas aos cidadáns, levándoas a asociacións veciñais, colexios, colectivos culturais e, en definitiva, ao ámbito máis próximo, porque, segundo recalcaron, os cidadáns están dispostos a separar, pero precisan que se lles explique claramente qué é o que hai que separar.
58 camións e 134 persoas para dar servizo a 35 concellos
En canto aos efectivos materiais e humanos que empregan na actualidade os 35 concellos que teñen xestión directa da recollida para prestar o servizo, poderían reducirse considerablemente coa posta en marcha dunha plataforma c0nxunta, xa que na actualidade se empregan 58 camións e 134 persoas. Así mesmo, hai distribuídos por estes municipios 15.000 contedores e 21 puntos limpos.
Segundo quedou patente na xuntanza, unha organización provincial das rutas (que evitaría, por exemplo, que dous camións distintos tivesen que ir recoller o lixo a unha mesmo núcleo de vivendas que pertence a dous concellos) permitirá a redución tanto de medios técnicos como humanos.
No que se refire aos camións, a consultora que comezará mañá un percorrido polos concellos da provincia para estudar a situación concreta e ir propoñendo posibles rutas e distribución dos medios, analizará o estado dos vehículos, algúns dos cales se poderían destinar ao lavado de contedores que na actualidade non se fai en moitos puntos do rural. Unha opción para o persoal excedente sería recolocalo noutras funcións de interese municipal.
Abrir 21 puntos limpos con horarios adaptados
Finalmente, a Deputación estuda facerse tamén cargo dos 21 puntos limpos que existen nos 35 concellos, moitos dos cales na actualidade teñen dificultades para mantelos operativos.
Incluír estes puntos limpos no servizo provincial permitirá dar unha boa cobertura a toda a provincia, cuns horarios de apertura adaptados e un servizo axeitado ás necesidades dos cidadáns.
Todas estas medidas, segundo salientou o presidente da Deputación, “están encamiñadas a ofrecer un servizo máis eficiente, máis eficaz e máis económico que beneficia a todos e tamén ao medio onde vivimos”.
15 rexedores de todas as opcións políticas
A comisión quedou constituída por 15 rexedores locais de todas as cores políticas e con representación de todas as comarcas, baixo a presidencia do máximo dirixente provincial, Rafael Louzán. Os alcaldes e alcaldesas que integran esta comisión son os de Silleda, Moraña, Mos, Pazos de Borbén, A Estrada, O Grove, Cotobade, Poio, Moaña, Vilaboa, Gondomar, A Cañiza, Caldas de Reis, A Illa de Arousa e Tomiño.
A comisión irá recollendo, avaliando e avalando os diferentes pasos que se dean para a implantación do servizo. Neste sentido, está previsto que antes do verán se presenten xa os resultados da auditoría encargada para coñecer a situación exacta da recollida nos 35 concellos que teñen xestión directa e que servirá de base articular as rutas, a distribución de contedores e a organización do servizo.
Ningún comentario:
Publicar un comentario