OURENSE

PRESENTADA NA DEPUTACIÓN A TITULACIÓN DE GRAO EN DIRECCIÓN E XESTIÓN PÚBLICA

Infogauda / Ourense

O catedrático de Ciencia Política da Universidade de Vigo, Argimiro Rojo, e o vicedecano da Facultade de Ciencias da Comunicación, Celso Cancela, presentaron hoxe na Deputación de Ourense a titulación de Grao en “Dirección e Xestión Pública”, unha carreira universitaria que se incorpora á oferta académica da Universidade de Vigo.
Trátase dunha titulación única en Galicia, que se imparte no Campus de Pontevedra, e segundo a definiu Argimiro Rojo “é unha titulación para a nova administración pública, que ten como obxectivo formar a profesionais baixo un enfoque multidisciplinar, con materias que abranguen Ciencia Política, Ciencia da Administración, Dereito, Economía, Marketing, Socioloxía, Contabilidade ou Informática”.

Pola súa banda, o presidente da Deputación, José Luis Baltar, dixo que esta é unha titulación “de gran utilidade para os profesionais que traballan na administración porque abrangue todos os ámbitos, tanto administrativos como políticos, nos que desenvolven a súa actividade, e ademais o feito de poder cursarse en horario de tarde posibilítalle aos funcionarios que o desexen compaxinar a súa labor profesional co estudo universitario”.

O perfil profesional da carreira permite aos titulados traballar como técnico en Administracións Públicas, xestor de organizacións públicas, analista de políticas públicas, analista político, asesor e consultor e axente de desenvolvemento local.

Ata o de agora, esta titulación era unha diplomatura que se viña impartindo na Universidade de Vigo dende hai dez anos, pero coa posta en marcha do “Plan Bolonia” -que propociou a adaptación das licenciaturas a titulacións de grao- a carreira de Dirección e Xestión Pública pasa a ser titulación de Grao, cunha duración de 4 anos, composta de 240 créditos, e para a que se habilitan 40 prazas.

O plano de estudos da carreira contempla a realización de prácticas en institucións, empresas e organizacións públicas, co fin de que os alumnos poidan estar permanentemente conectados co mundo laboral. Ademais existen convenios ERASMUS para a realización de estudos en varias universidades europeas, así como convenios de intercambio con outras universidades españolas e latinoamericanas.