A GUARDA

Vento Mareiro abre o curso cunha aposta polo baile e a tradición  

Ricardo Rodríguez Vicente/A Guarda

 A Agrupación Folklórica Vento Mareiro prepara un novo curso cunha proposta dirixida tanto a quen queira iniciarse no folclore galego como ás persoas que xa teñen experiencia. A entidade anuncia para este mes de setembro o inicio das súas clases de pandeireta e baile tradicional, abertas a nenos e adultos e con dous niveis: iniciación e avanzado.  

 As sesións desenvolveranse no Centro Cultural de A Guarda e o mes de setembro estará marcado polo carácter de portas abertas da actividade. A agrupación convida así a achegarse, probar e coñecer de primeira man unha formación que combina a aprendizaxe da pandeireta co baile tradicional, sen compromiso. 

 A programación complétase cunha actividade de carácter máis puntual e intensivo. O sábado 26 de setembro, de 16.00 a 20.00 horas, a sede da asociación acollerá o curso Primeiros pasos de baile para un serán, impartido por Leni Pérez. Trátase dunha proposta pensada para achegar os participantes aos primeiros pasos necesarios para desfrutar do baile nun serán, nunha sesión concentrada de catro horas.  

 O curso intensivo ten un prezo de 25 euros e require inscrición previa. Para obter máis información, tanto sobre esta actividade como sobre as clases regulares de pandeireta e baile tradicional, a asociación Vento Mareiro facilita o teléfono 685 675 500.  

 Con estas dúas propostas, a agrupación inicia o novo curso poñendo no centro a transmisión e a práctica da cultura tradicional, combinando a formación continuada coa celebración de actividades específicas arredor do baile.