O Festival de Blues da Guarda encherá de ritmo a praza do Reló
• O vindeiro sábado, 18 de xullo
Infogauda/A Guarda
A Guarda volverá converterse nun punto de encontro para os amantes do blues o próximo 18 de xullo coa celebración dunha nova edición do Festival de Blues A Guarda, unha cita xa consolidada dentro da programación cultural do verán guardés.
O festival, de acceso libre, reunirá na praza do Reló artistas nacionais e internacionais nunha intensa xornada de música en directo que se desenvolverá en sesión vermú e sesión de noite.
A programación arrancará ás 12:30 horas coa actuación de Mr. Wolf & The Blues Freaks, seguida do concerto de Jay Doe & Blues Preachers, ofrecendo ao público unha primeira toma de contacto co mellor blues en pleno corazón da vila.
Xa pola noite, a partir das 21:00 horas, será a quenda do músico Juan Zelada e da cantante Giselle Jackson, dous nomes destacados que achegarán diferentes matices e influencias ao escenario do festival. A xornada rematará coa sesión de DJ Maeso, que pechará o evento cunha selección musical en formato vinilo.
O Festival de Blues da Guarda continúa así apostando por unha programación de calidade, contribuíndo a reforzar a oferta cultural estival do municipio e consolidando A Guarda como un referente para a música en directo durante o verán.
Ningún comentario:
Publicar un comentario