A GUARDA

A GUARDA ACOLLERÁ O PECHE DA XXXI EDICIÓN DO ENCONTRO DOS POBOS 

•  O Auditorio de San Bieito acollerá este luns, 27 de xullo, ás 20:30 horas, a clausura do festival, que reúne formacións da Guarda e Romanía nunha celebración da música, a danza e o intercambio cultural 

Infogauda/A Guarda

 O Auditorio de San Bieito, da Guarda converterase este luns, 27 de xullo, a partir das 20:30 horas, no escenario da última xornada da XXXI edición do Festival Internacional Encontro dos Pobos, unha cita organizada polo grupo folclórico Do Lusco ó Fusco que, desde hai máis de tres décadas, promove o encontro entre culturas a través da música e do baile tradicional. 

 O festival, que ao longo de catro días percorre os concellos de Tomiño, O Rosal, Oia e A Guarda, mantense como un referente do intercambio cultural e da difusión do folclore, grazas ao compromiso dos integrantes de Do Lusco ó Fusco por preservar as tradicións e fomentar valores como a convivencia, o respecto e a irmandade entre os pobos. 

 Na xornada de clausura participarán o grupo anfitrión Do Lusco ó Fusco e a formación guardesa Vento Mareiro, que compartirán escenario cos grupos romaneses Doina Ilfovulu i e Vatra Buftei. Estas agrupacións achegarán ao público unha mostra da riqueza do folclore de Romanía, a través da súa música tradicional, do seu vestiario e de coreografías representativas de distintas rexións do país, con especial protagonismo das zonas do sur romanés. 

 O festival ofrece así unha oportunidade única para coñecer e desfrutar da diversidade cultural, poñendo en valor o patrimonio inmaterial de Galicia e favorecendo o diálogo entre tradicións de diferentes países.