O PSdeG-PSOE de Tomiño solicita declarar o municipio “Libre de Prostitución e Trata”
Infogauda / Tomiño
O Grupo Municipal do PSdeG-PSOE de Tomiño, a través da súa voceira Violeta de Santiago Moure, presentou hoxe unha moción para o seu debate en Pleno co obxectivo de converter a Tomiño nun “Concello Libre de Prostitución e Trata de Mulleres e Nenas”.
A iniciativa socialista busca que o Concello asuma un compromiso activo contra o que consideran “unha forma extrema de violencia de xénero e unha violación dos dereitos humanos”. Segundo explica De Santiago, a prostitución e a trata son “dúas caras da mesma moeda” que responden a unha desigualdade estrutural onde o corpo das mulleres convértese nunha mercadoría.
Foco no proxenetismo e axuda ás vítimas
A moción presentada polo PSdeG-PSOE propón medidas concretas para abordar esta problemática desde o ámbito local:
1. Ordenanza Municipal: Instar ao Goberno Local a elaborar unha norma que promova a erradicación da explotación sexual no concello.
2. Protección sen sancións: Garantir que os Servizos Sociais ofrezan atención integral, formación e alternativas de emprego ás mulleres, deixando claro que o Concello nunca sancionará ás vítimas, senón que se centrará en desincentivar a demanda.
3. Sensibilización: Reforzar as campañas dirixidas á mocidade para visibilizar que a prostitución é violencia machista e eliminar calquera publicidade de servizos sexuais nos medios e espazos públicos municipais.
“A adhesión á Rede de Municipios Libres de Prostitución supón poñer o foco no cliente e no proxeneta, e non na muller explotada. As institucións públicas teñen a obriga de ofrecer alternativas reais”, defende a voceira socialista.
Finalmente, a moción tamén insta ao Goberno de España e á Xunta de Galicia a aprobar unha Lei abolicionista que penalice o proxenetismo en todas as súas formas e a compra de sexo, seguindo as recomendacións do Parlamento Europeo e o Convenio de Istambul.
.jpg)
Ningún comentario:
Publicar un comentario