BALONMÁN FEMININO
O Guardés queda curto e segue tendo no Beti o seu talón de Aquiles (24-19)
• O equipo baixomiñoto contou a súa quinta derrota este martes en Navarra, na súa visita a un Beti-Onak contra o que non consegue facerse forte
• Aínda que non empezaron mal a primeira parte, as de Ana Seabra pecaron de 20 minutos sen anotar (do 15 ao 35) que as deixaron ata sete goles por baixo. Aínda que na segunda metade unha remontada prometía outro resultado, as locais aproveitáronse de varios erros para volver impoñerse
• O Guardés notou hoxe o seu cadro de persoal curto, con só 12 xogadoras desprazadas ao caer da convocatoria Cecilia Cacheda, recuperándose da rotura de beizo que sufriu en Valladolid
• As 15 paradas de Amandine Balzinc, a única luz guardesa do encontro
Redacción Deportes / Villava
O Mecalia Atlético Guardés suma unha de cal. As de Ana Seabra volveron caer este martes en Villava, na súa visita a un Replasa Beti-Onak que se impuxo como local e parece seguir resistíndolle ao equipo baixomiñoto. Aínda que o inicio foi prometedor, o Mecalia pecou de 20 minutos sen anotar entre o ecuador da primeira parte e o inicio da segunda que lastraron o seu partido, mentres as anfitrioas duplicábano en goles. Unha remontada que reduciu a renda a tan só dúas tantos daba esperanzas no minuto 40, pero 11 perdas de balón, xunto co desacerto no lanzamento e a defensa da portería de Patricia Encinas e Olaia Luzuriaga fixeron imposible puntuar ás guardesas (24-19). Amandine Balzinc e as súas 15 paradas, o máis destacable entre as filas baixomiñotas, que este martes notaron a súa falta de efectivos ao só estar 12 desprazadas, dada a ausencia de Ceci Cacheda que segue recuperándose dunha dolorosa rotura do beizo.
O primeiro gol chegou da man de Mica Casasola desde os nove metros, algo antes do segundo minuto de xogo. O partido ofrecía un ritmo elevado desde o comezo, con ambos os equipos correndo moito e apertando tanto en defensa como en ataque. O Guardés tomou nota e imitou a estratexia para sortear a barreira local, e pronto chegou a igualdade no luminoso e comezou a ser difícil seguir o ritmo (2-2, min. 4).
Elena Martínez anotou de penalti e puxo ás súas por diante por primeira vez pouco despois. Con todo, varias decisións precipitadas levaron a perder o balón en momentos clave para confirmar esa superioridade, polo que as táboas persistiron durante varios minutos (4-4, min. 8). As de Ana Seabra terían que manter a mente fría nos longos compases que quedaban aínda por diante se querían levar os dous puntos de volta a casa.
E esa era a misión, aínda que non sería sinxela. Outro de Martínez desde ben lonxe da portería volvía á renda mínima guardesa, e a partir de aquí as xogadoras de Beti-Onak convertéronse en auténticas sombras das galegas. Non había aire para respirar entre ambos os equipos, atentos por igual a cada movemento que puidesen aproveitar para a rede rival: cada detalle podía ser crucial para o resultado. Aínda era pronto para pensar no final, e os esforzos das visitantes centráronse en remar para abrir o máximo oco posible, o que o segundo penalti da lateral mislateña conseguía xa máis preto do ecuador desta primeira metade (4-6, min. 11).
Pero pronto volveu a igualdade, pois as anfitrioas non poñerían tan fácil a vitoria en Villava. O Beti asestou, aínda que menos frenético, un parcial 2-0 que devolvía o partido ao empate, e Ana Seabra solicitaba parar o tempo por primeira vez en todo o partido, coa intención de redirixir o traballo das súas cara a augas máis seguras (6-6, min. 14).
O resultado non foi o desexado, pois aínda que as guardesas volveron á pista cun prometedor acerto de Ania Ramos que volvía facelas liderar, as de Miguel Exteberria reaccionaron con extremo acerto e encadearon ata tres goles seguidos que abrían agora oco ao seu favor. A psicoloxía comezou a afectar o Guardés, que pecaba agora dun desacerto no lanzamento repentino que lle privou de recuperarse, tanto ao instante como en xeral, dunha crecida local que campaba ás súas anchas (9-7, min. 21). Tampouco o poñía nada sinxelo a portería navarra, pois Patricia Encinas contaba xa seis paradas baixo paus, mentres Olaia Luzuriaga apareceu para frear dúas oportunidades guardesas clave desde os sete metros.
Seis eran tamén xa as perdas das de Ana Seabra, que regalaron ata dúas ocasións máis a un Beti que se afastaba perigosamente no marcador (11-7, min. 26). Non puido recuperarse xa o Guardés no que restou de primeira parte, caendo en picado froito dunha gravísima seca de goles que se remontaba ata o minuto 15, o que implicaba unha ausencia total de acerto ofensivo en toda a segunda metade desta primeira parte e un 9-1 demoledor (13-7, min. 30). A situación e mentalidade no equipo galego debía dar un xiro de 180 graos nos vestiarios se quería ter algunha opción de fronte ao triunfo.
Pero non foi así, pois a segunda parte inaugurouse con catro perdas máis de balóns guardeses e un novo acerto das locais, que xa duplicaban os goles das primeiras (14-7, min. 35). Saltaban as alarmas nun Guardés onde non parecía funcionar nada, cun ataque completamente bloqueado e unha defensa que tampouco estaba a ofrecer moitos recursos. Nada, fóra dos reflexos de Amandine Balzinc, con sete paradas que facían control de danos.
Espertou entón o persoal do Mecalia e puido encadear dous goles, os primeiros en 20 minutos, que lle deron algo de aire por fin (14-9, min. 38), aínda que non sen seguir pecando dun desacerto que lle fixo desaproveitar outro par de oportunidades que serían importantes. Con todo, o importante foi que as de Ana Seabra seguiron remando e crecendo ata, da man doutro tanto de María Sancha e das achegas de Amandine Balzinc, ben baixo paus, ben a portería baleira, reducir a distancia de maneira significativa (14-11, min. 39). En apenas dez minutos, o visitante lograra responder cun parcial 4-0 que obrigaba a Etxeberria a pedir o tempo morto.
De maneira sorprendente, os papeis intercambiáronse por un momento no Hermanos Indurain, e foi o Beti quen sumou minutos moi importantes sen golear, mentres o seu rival crecía. A defensa baixomiñota incrementou a presión e fíxose con algún que outro balón máis que, grazas ao ataque a sete, acabou na rede local desprotexida. Non respiraron as navarras ata case o ecuador da segunda parte, anotando por primeira vez desde o descanso para recuperar a diferenza de tres goles, incrementada a catro polo penalti de Casasola inmediatamente posterior (16-12, min. 44). O encontro non baixou o ritmo en ningún momento, con ambos os equipos moi conscientes de que non poderían confiarse ata o final. Pois en apenas minutos, o anfitrión había replicado cun 3-0 que volvía abrir un oco moi complexo de salvar (17-12, min. 47).
A falta de dez minutos, aínda que a balanza comezaba a inclinarse cara ao lado do Beti-Onak, o Guardés aínda vía posible unha segunda remontada para puntuar. Planificouno Seabra chamando ao tempo morto no minuto 50, xusto cando as locais conseguían abrir ese abismo un pouquiño máis (19-13).
A fórmula estaba clara: presionar ata o final sen nada que perder. Así o fixo a defensa visitante, desesperada por rascar algún balón que a axudase a escalar a montaña do marcador. E conseguiuno, aumentando o ritmo de goles con respecto ao seu rival de forma significativa, da man dunha Balzinc completamente centrada na misión que acumulou 15 paradas nos 60 minutos de xogo. Pero tamén cedeu a barreira guardesa máis do necesario, concedendo á ofensiva visitante ocos e penaltis que non podía permitirse. Finalmente, as anfitrioas igualaron a presión para ofrecer a mesma dureza que na primeira metade e levar os dous puntos grazas a unha diferenza de cinco goles (24-19, final).
O cadro de persoal do Guardés, máis curto aínda ao non poder contar con Cecilia Cacheda despois da súa rotura de beizo fai dúas fins de semana en Valladolid, sucumbe ao ritmo do calendario e volve caer, pero coa mirada posta xa nos seguintes banzos e no camiño a eliminatoria
Replasa Beti-Onak (13+11): Kelly Fonkeng, Mica Casasola (8), Lucía Zamora (2), María Brasil (2), Isabel Fernández-Agustí (3), Aileen Ripa (1), Olaia Luzuriaga (p.), Macarena Sans, Almudena Gutiérrez (2), Elsa Ventura, Libe Arruabarrena (1), Maialen Orbañanos, Patricia Encinas (p.), Laida Urbitarte (1), Nerea Canas (4) e Mariana Costa.
Mecalia Atlético Guardés (7+12): Sabina Mínguez (p.), África Sempere, Jazmín Mendoza (2), Blazka Hauptman, Lorena Téllez (2), María Palomo (3), Rosane Serrano (1), Elena Martínez (4), Carme Castro (1), María Sancha (3), Ania Ramos (2) e Amandine Balzinc (1) (p.).
Marcador cada cinco minutos: 2-2, 4-5, 6-6, 9-7, 10-7, 13-7, 14-7, 14-11, 16-12, 18-13 21-16, 24-19.
Árbitros: Miquel Florenza e Jordi Ausas. Amoestaron con tarxeta amarela á local Almudena Gutiérrez e excluíron con dous minutos ás locais Kelly Fonkeng (2) e Almudena Gutiérrez, e ás visitantes Lorena Téllez e María Palomo (2).
Incidencias: Partido de décimo novena xornada da liga Guerreiras Iberdrola 2025/2026, aprazado no seu momento por incompatibilidades horarias, disputado no Polideportivo Municipal Hermanos Indurain (Villava).
Ningún comentario:
Publicar un comentario