DEPORTES

 BALONMÁN FEMININO

Dispoñibles xa as entradas para cuartos de final da EHF European Cup na Sangriña 

• O Guardés saca á venda as entradas para o próximo encontro de ida de cuartos de final da competición europea, que terá lugar o sábado 21 de marzo ás 19.00 horas na Sangriña contra o Atticgo BM Elche  

• As entradas poden adquirirse na oficina do Club dende este luns, cun prezo xeral de 25 euros para non abonados e de 15 euros para quen si teña abono. Os abonados poderán sacar unha entrada adicional ao mesmo prezo reducido sen necesidade de ensinar un segundo carné 

• Os socios de número terán entrada de balde, aínda que deberán recoller o seu convite igualmente xa sexa na oficina ou na taquilla

 

Redacción Deportes / A Guarda 

 O Mecalia Atlético Guardés prepárase para continuar co soño europeo na casa. Este luns, o equipo baixomiñoto sacou á venda as entradas para o primeiro partido de cuartos de final da EHF European Cup, que disputará o vindeiro sábado 21 de marzo ás 19.00 horas na Sangriña ante o Atticgo BM Elche. As entradas poden adquirirse xa na oficina do Club ou a través da plataforma en liña Cluber, a diferentes prezos de venda segundo o tipo de afeccionado e o número de entradas. 

 O Guardés espera unha nova xornada festiva coa que seguir celebrando a súa presenza en Europa e apoiándose da súa afección para financiar a mesma. O partido, coma xa acontecera coa fase Last 16, será retransmitido en directo pola Televisión de Galicia, e comezará ás 19.00 horas. A taquilla abrirá unha hora antes, se ben dende este luns 9 de marzo, a falta de dúas semanas, están xa dispoñibles as entradas para tódolos afeccionados a recoller na oficina do Club de ata o venres en horario de 17.00 a 20.00 horas. 

 De novo, a entidade baixomiñota diferenciou os prezos das entradas segundo o tipo de afeccionado, se ben baixouno con respecto á fase anterior para todos eles. O prezo de entrada xeral para os non abonados será de 25 euros, sen distincións entre idades. Estas poden adquirirse xa a partir da tarde deste luns na oficina, o día do partido na taquilla ou na plataforma en liña Cluber: https://app.cluber.es/legacy/clubes/b84295873d95a8a4fb331b3b487c16e3cb4794ea/pagos/69aa87bf0ecd1195024090. 

 Pola súa parte, os abonados volven obter algunhas vantaxes. Cabe lembrar que ningún dos distintos tipos de abono anunciados en agosto inclúe a competición europea, polo que o Club reservou para eles un prezo reducido de 15 euros sen distinción entre idades. De novo, os abonados poderán obter as súas entradas ben na oficina durante a semana ou ben o sábado en taquilla, pero non hai opción de compra online para abonados, polo que a ligazón de Cluber non é válida para este caso. Ademais, como oferta adicional exclusiva á venda anticipada, cada abonado poderá mercar unha segunda entrada ao mesmo prezo sen necesidade de ensinar un segundo carné.  

 Os socios de número, por último, si teñen incluído o acceso a tódalas competicións nos seus carnés. Non terán que pagar entrada para este sábado, se ben deberán recoller un convite para poder acceder, xa sexa durante a semana na oficina ou o mesmo sábado en taquilla. 

 Os menores de 12 anos, independentemente de se son abonados ou non, terán entrada gratuíta ao partido, como é habitual tamén nos encontros de Liga. 

Táboa completa coas distintas opcións de entrada e onde adquirilas: 

 Aínda que, a excepción da oferta de entrada adicional por 15 euros para abonados, tódolos tipos de entrada poden recollerse o sábado en taquilla, o Club agradece que, na medida do posible, os afeccionados recorran á venda anticipada e adquiran as súas entradas na oficina ao longo destas semanas para liberar a taquilla todo o posible o sábado e asegurar un acceso puntual ao pavillón.  

AXENDA 

EHF European Cup | Cuartos de final – Ida  

Mecalia Atlético Guardés – Atticgo BM Elche  

Sábado, 21 de marzo | 19.00 horas | A Sangriña  

Retransmitido en directo a través da Televisión de Galicia e agalega.gal