OIA

O PSOE de Oia reclama á Xunta a creación dun centro de día e insiste en que “é unha necesidade urxente para as persoas maiores do municipio”

 

Para o PSdeG-PSOE o centro de día de Oia debe formar parte do Plan de Equipamentos Sociais da Xunta

Foto: Cedida

Infogauda / Oia

 O PSOE de Oia reclama á Xunta de Galicia que cumpra cos compromisos adquiridos e poña en marcha o proxecto dun centro de día no municipio, unha infraestrutura “urxente e imprescindible” para garantir a atención digna das persoas maiores e dependentes. 

 As deputadas socialistas Elena Espinosa, Silvia Longueira e Patricia Iglesias, xunto co portavoz parlamentario José Ramón Gómez Besteiro, veñen de rexistrar no Parlamento de Galicia unha proposición non de lei coa que o Grupo Parlamentario dos Socialistas de Galicia demanda á Xunta unha partida orzamentaria específica e un calendario concreto para a construción e posta en marcha do centro. 

 Oia conta cunha poboación duns 3.000 habitantes, dos cales case un terzo supera os 65 anos. “Falamos dun concello rural, con dispersión xeográfica e unha poboación moi envellecida, onde moitas persoas maiores viven soas ou dependen do coidado familiar. É urxente actuar”, subliñou a deputada Elena Espinosa. 

 A parlamentaria socialista advertiu que a falta deste servizo obriga a moitas persoas a desprazarse quilómetros para recibir atención diúrna, o que “agrava o illamento, incrementa a carga das familias coidadoras e impide desenvolver políticas de prevención e autonomía persoal”. 

 O PSOE lembra que xa en novembro de 2024 reclamou a inclusión dunha partida nos orzamentos de 2025 para iniciar este proxecto, “pero a día de hoxe nada se sabe”. Por iso, o grupo insiste en que o centro de día de Oia debe formar parte do Plan de Equipamentos Sociais da Xunta, e denuncia o abandono do rural por parte do Goberno galego: “É inadmisible que concellos pequenos, con poboación envellecida e gran dispersión, sigan esquecidos mentres se presumen investimentos noutras zonas máis visibles”. 

 O grupo socialista pide á Xunta que, ademais de reservar fondos no próximo orzamento, defina a localización óptima do centro de día, preferiblemente nun núcleo ben comunicado, e que comprometa prazos concretos para o inicio das obras e posta en funcionamento. 

 Para o PSOE de Oia, este proxecto “non é só unha cuestión de servizo social, senón de xustiza territorial e de dignidade”. “A nosa veciñanza merece envellecer no seu propio municipio, con servizos próximos e de calidade”, conclúen as representantes socialistas.