CAMPOSANCOS (A GUARDA)

INAUGURADA A EXPOSICIÓN “AS PORTAS DO HORROR. O CAMPO DE CONCENTRACIÓN DE CAMPOSANCOS”

•  Permanecerá aberta ata o dia 26 de outubro, con horario de 11 a 13 e de 19 a 21, na Casa de Montes de Camposancos

Momentos nos que José Manuel Domínguez Freitas, presidente da ARMH do Campo de Concentración de Camposancos e Fosa Común de Sestás, se dirixía ás persoas que asistiron á inauguración da exposición “As portas do horror. O Campo de Concentración de Camposancos”

Bárbara Domínguez González / Camposancos

 Este pasado venres, con gran afluencia de público, inaugurouse a exposición “As portas do horror. O Campo de Concentración de Camposancos”. Está subvencionada pola Secretaría de Estado de Memoria Democrática e organizada pola ARMH do Campo de Concentración de Camposancos e Fosa Común de Sestás. Permanecerá aberta ata o dia 26 de outubro, con horario de 11 a 13 e de 19 a 21, na Casa de Montes de Camposancos. 

 Antes de pasar ó local onde se ubica a exposición, o presidente da asociación dirixiu unas palabras ás persoas asistentes. Agradeceu primeiro “a tan masiva participación na inauguración, algo que fai que nos sintamos aínda cunha maior responsabilidade”. En segundo lugar, mostrou a súa gratitude a Secretaría de Estado pola subvención concedida para facer a exposición e a Comunidade de Montes de Camposancos por facilitar o local para instalala.  

 “É unha exposición - afirmou - pensada para que poida interesarlle a todo o mundo: o alumnado da ESO, as persoas maiores, para quen teña unha formación académica, por que ten rigor histórico e, para quen por avatares da vida, teña menos formación, porque é amena”.

Vista parcial da exposición, instalada na Casa da Comunidade de Montes de Camposancos, e unha representación do público que asistiu ao acto inaugural

 

 A continuación, desvelou os tres apartados dos que consta a exposición: vídeo, paneis e audioguías, engadindo que non ía dicir nada máis porque o público estaba a cinco minutos de poder ver e opinar sobre a mesma. 

 Por último fixo unha petición: “Se vós gusta contádello as persoas da vosa contorna, porque esa é a mellor propaganda”. Engadiu que se trata dunha exposición itinerante e facilmente trasladable: “iremos a onde se nos pida”. 

 Escusou ao Subdelegado do Goberno, que non puidera estar presente e deu lectura a unhas palabras súas, nas que destacou: “Hay un capítulo en la historia de Camposancos que hay que leer y recordar. Esta exposición es buena muestra de ello”.