OIA

Inscrición aberta para o programa Aula de Acollida do Concello de Oia 

 

   Casa do Concello de Oia

Foto: HombreDHojalata

Infogauda / Oia   

 O Concello de Oia prepárase para o comezo do próximo curso escolar e, un ano máis, porá en marcha o seu programa Aula de Acollida, que busca garantir a conciliación da vida laboral e familiar. As familias que queiran inscribir aos seus fillos e fillas neste servizo municipal poderán presentar a súa solicitude na Casa do Concello ata o xoves 4 de setembro.  

 O programa arrancará co comezo do curso escolar 2025-26, o día 8 de setembro, e desenvolverase nunha das aulas do CEIP Mestre Manuel García. O servizo estará dispoñible desde as 7.30 horas ata o inicio das clases e, durante este tempo, os nenos e nenas asistentes desfrutarán de xogos, actividades de lecer, etc.  

 A folla de matriculación na aula municipal de acollida deberá presentarse no Rexistro Xeral do Concello, achegando xunto a ela a seguinte documentación: resgardo de matrícula escolar, copia do libro de familia, copia dos DNI da nai e do pai, título de familia numerosa -de ser o caso-, e fotocopia da cartilla da seguridade social do menor.  

 O prezo do servizo é de 30 euros ao mes (con almorzo) e de 25 euros ao mes (sen almorzo), agás no caso de subscribirse ao programa máis dun irmán. Nestes supostos aplicarase unha bonificación do 20% (no caso de ter dous usuarios do servizo na mesma unidade familiar) ou un 40% (no caso de ter tres usuarios do servizo na mesma unidade familiar).  

 Ademais das persoas que empreguen o servizo de Aula de Acollida de xeito habitual, o Concello de Oia tamén pon a disposición das familias a posibilidade de facer uso do servizo por días soltos. Neste caso as tarifas son de 2,50€/día (con almorzo) e 2,00€ (sen almorzo).