O ROSAL

O Rosal aposta polo futuro deportivo e a canteira cunha reforma estratéxica do pavillón municipal  

• O Concello capta fondos externos para o proxecto de mellora da eficiencia enerxética, luminosidade, confort e acústica destas instalacións posto en marcha da man do Valinox Novás  

• Continúa a transformación planificada do pavillón, no que xa se cambiou a pista, reformáronse os vestiarios, mellorouse a accesibilidade ou se creou unha grada de animación para a canteira 

A alcaldesa, Ánxela Fernández Callís, e o concelleiro de Deportes, José Carlos Martínez Crespo, con directivos, colaboradores e seareiros do Valinox Novás

Foto: C.O.R.

Infogauda / O Rosal

 O Rosal prepara unha transformación clave para o futuro do deporte local coa reforma da cuberta do pavillón municipal, un proxecto de mellora das instalacións no que o Concello traballou de forma conxunta co Valinox Novás. Cun investimento de case 300.000 euros, o Goberno municipal capta fondos externos para a posta en marcha desta mellora que continúa a liña estratéxica de transformación e mantemento das instalacións municipais.  

 A alcaldesa, Ánxela Fernández Callís, destacou a importancia desta reforma “para seguir apostando por infraestruturas de calidade que garantan a seguridade, o benestar e unha mellor saúde deportiva para as nosas e nosos deportistas, especialmente para a canteira, que representan o futuro do deporte e da sociedade rosaleira”. 

 Pola súa banda, o concelleiro de Deportes, José Carlos Martínez Crespo, puxo en valor o traballo que está a realizar o Valinox Novás e o impacto positivo da reforma. “Este ano o club cumpre 50 anos e celebramos o seu compromiso coa canteira cunha nova mellora histórica no pavillón. Máis de 200 nenos e nenas practican balonmán nestas instalacións e merecen contar cun espazo renovado”. 

 Estas obras suporán un paso fundamental na mellora da eficiencia enerxética do pavillón municipal coa substitución da cuberta e das fachadas, así como a adecuación da superficie no tellado para acoller a colocación de placas das comunidades enerxéticas para o futuro do Rosal. Tamén se instalará un novo sistema de ventilación para a mellora térmica do interior, con control de humidade relativa e temperatura e se mellorará a iluminación. Os traballos complementaranse coa optimización da megafonía instalando un novo sistema que permitirá a reformulación e mellora da acústica no recinto.  

 Esta transformación forma parte da planificación estratéxica posta en marcha nos últimos anos no Concello para a mellora das instalacións deportivas no pavillón municipal, que incluíu xa a renovación completa da pista para garantir un espazo axeitado e seguro para a práctica deportiva intensiva, a remodelación de vestiarios e duchas coa inclusión de un aseo adaptado, o cambio da caldeira por unha de biomasa para reducir o consumo, as melloras en accesibilidade ou a instalación dunha grada supletoria que se emprega como espazo de animación para a canteira do Valinox Novás.  

 Dende o Concello agradécese o esforzo do club, da directiva, das persoas implicadas, das empresas colaboradoras e das familias e de todas as persoas que apostan pola práctica deportiva no Rosal. Con esta nova reforma, o municipio segue a consolidarse como un referente na mellora constante de infraestruturas municipais e no apoio ao deporte de base, xa que, como destaca a rexedora, “ademais de saúde, co fomento do deporte compártense valores sociais e educativos importantes como o traballo en equipo, o compañeirismo, a solidariedade ou o compromiso colectivo”.