GALICIA

O Sindicato Nacional de CCOO de Galicia fai un chamamento á participación o próximo domingo, 6 de abril, na manifestación convocada por SOS Sanidade Pública 

Sindicato Nacional de Comisións Obreiras de Galicia 

 O noso sistema público de saúde caracterízase por ser universal, gratuíto, solidario e de calidade. As políticas de recortes e privatizacións do Partido Popular queren rachar con estes principios, facendo do dereito á protección da saúde un negocio e impedindo un acceso igualitario a ela. Por iso, para cambialas é necesaria unha gran mobilización social que debe ter a súa máxima expresión na manifestación do día 6.  

 A plataforma SOS SANIDADE PÚBLICA, da que CCOO forma parte, convoca unha manifestación que partirá da Alameda de Santiago de Compostela ás 12:00 horas, baixo o lema «MÁIS ATENCIÓN PRIMARIA. MÁIS ATENCIÓN HOSPITALARIA. MÁIS SANIDADE PÚBLICA».  

 Precisamente, eses son os tres eixes principais das reivindicacións formuladas por SOS Sanidade Pública:  «Máis atención primaria», con dotación de persoal suficiente de todas as categorías para centros de saúde e PAC. Tamén, acceso á atención en 24-48 horas, consultas presenciais a pedimento do paciente, centros ben equipados e unha reorientación da Atención Primaria cara á promoción da saúde, a prevención, o traballo comunitario e a participación social.  

 «Máis atención hospitalaria», para o cal se esixe o uso pleno dos recursos hospitalarios en quenda de mañá e tarde, a reversión dos recortes nos hospitais comarcais, a eliminación da concertación coa sanidade privada, a restitución ao sistema público dos centros privatizados, plans efectivos para reducir as listaxes de espera, mellora das condicións laborais do persoal e esixencia de dedicación exclusiva ao persoal médico.  

 «Máis sanidade pública», comezando por elevar o orzamento do sistema sanitario público, mais tamén a elaboración dun plan galego de saúde que adapte os recursos ás necesidades reais da poboación, recuperación de servizos e áreas de saúde privatizadas ou pechadas e reforzamento do sistema para facer fronte aos riscos e epidemias que afectan a saúde colectiva.  

 Por todo isto, CCOO fai un chamamento á sociedade galega para participar activamente nesta mobilización, lembrando que a saúde «é un dereito fundamental, non un negocio».