DEPORTES

BALONMÁN FEMININO

Liga Guerreras Iberdrola

O MECALIA ATLÉTICO GUARDÉS RECIBE AO MÁLAGA COSTA DEL SOL

•  Este sábado, 5 de abril, ás 18:00 horas, no pavillón municipal A Sangriña

Redacción Deportes / A Guarda

O pavillón municipal A Sangriña prepárase para acoller unha tarde de emocións fortes. Este sábado 5 de abril, ás 18:00 horas, o Mecalia Atlético Guardés recibirá ao Costa do Sol Málaga, o seu principal perseguidor na liga Guerreras Iberdrola, nun duelo que se presenta como clave na loita polo liderado.

O partido, correspondente á xornada 23, será retransmitido en directo por Teledeporte. 

A pesar da vantaxe de catro puntos do conxunto guardés –que aínda ten un encontro aprazado contra Bera Bera–, cada partido convértese nunha final neste tramo decisivo da tempada. O equipo de Ana Cristina Teixeira Seabra chega en plena forma tras a vitoria lograda o mércores fronte ao Atticgo BM Elxe, un triunfo moi traballado (18-20) que reforzou o liderado das galegas. 

Baixas sensibles no Mecalia Atlético Guardés 

O Mecalia Atlético Guardés terá que enfrontarse ao conxunto andaluz sen dúas xogadoras crave: Cecilia Cacheda, aínda en repouso por microrroturas fibrilares, e Jazmín Mendoza, cunha escordadura de grao II no nocello esquerdo. Ambas estarán ausentes neste encontro, aínda que se espera a súa recuperación durante o parón ligueiro antes do próximo derbi fronte ao Porriño o 20 de abril. 

Un Málaga con ganas de desquite 

O equipo dirixido por Jesús Gallardo chega crecido, tras sumar tres vitorias contundentes ante Beti-Onak, Porriño e Elda. Ademais, as malagueñas buscan vingarse da derrota sufrida ante o Mecalia Atlético Guardés na primeira volta (21-26), nun dos poucos tropezos que tiveron esta tempada. 

Con todo, A Sangriña vestirase de gala, xa que o club lanzou varias promocións para encher as bancadas, incluíndo entradas reducidas e sorteos en redes sociais. Espérase un ambiente inmellorable para un choque que pode marcar o desenlace da liga. 

Ana Cristina Teixeira Seabra: “Será un partido moi difícil; necesitamos a nosa mellor versión” 

A adestradora do Mecalia Atlético Guardés, Ana Cristina Teixeira Seabra, destacou a dificultade do encontro: “Enfrontámonos a un equipo que mellorou moito nas últimas semanas. Recuperou a xogadoras clave como Patri Lima, Espe López ou Alice Fernandes, e incorporou a Marta López”. 

Sobre o partido, Seabra foi clara: “Será moi difícil, teremos que estar na nosa mellor versión para sumar os dous puntos”. Tamén subliñou a importancia do público: “Espero un gran partido cun pavillón a lume de biqueira. Queremos que sexa un espectáculo deportivo a todos os niveis, como xa é costume en O Inferno”. 

Será ademais o partido estrela da xornada ligueira, retransmitido en directo por televisión a través de Teledeporte. O Mecalia Atlético Guardés afrontará o duelo coas baixas confirmadas de Jazmín Mendoza e Cecilia Cacheda, ambas fóra da convocatoria debido a lesións leves que requiren algúns días máis de repouso. Para completar o persoal, o corpo técnico convocou ás xogadoras xuvenís Ángela Portela e Carmen Magallanes, que estarán dispoñibles para este importante compromiso na Sangriña.