TUI

Abel Losada visita a Comandancia Naval do Miño para comprobar o impacto da labaza  

 O subdelegado do Goberno visitou a Comandancia Naval tudense para repasar a “axenda fluvial”  

O subdelegado do Goberno en Pontevedra, Abel Losada, comprobando o impacto da planta invasora egeria densa, coñecida popularmente como labaza, no leito do río Miño

Foto: S. do G.

Infogauda / Tui 

 O subdelegado do Goberno en Pontevedra, Abel Losada, que xa ten visitado en varias ocasións a Comandancia Naval do Miño, atendeu a invitación do seu responsable, o comandante Andrés Díaz Ripoll, para comprobar o impacto da planta invasora egeria densa, coñecida popularmente como labaza, no leito do río Miño.  

 O subdelegado do Goberno comprometeuse a trasladar a información ao departamento responsable do Servizo de Patrimonio Natural da Consellería de Medio Ambiente e Cambio Climático da Xunta de Galicia. Neste senso, indicou que apoiaría unha iniciativa para que este departamento da Xunta impulsase un proxecto europeo, en colaboración coas autoridades de Portugal, para actuar contra estas especies invasoras. 

 Losada subliñou, así mesmo, que mantén contacto permanente co Servizo Provincial de Costas para atender as competencias estatais que teñen que ver coa erosión e a posible dragaxe de diferentes tramos do río. A este respecto indicou que se está a elaborar un estudo da dinámica fluvial por parte do CEDEX, o organismo técnico dependente do Ministerio de Transportes que realiza este tipo de análises, antes de tomar decisións. 

 O subdelegado quixo destacar tamén o importante labor de Díaz Ripoll ao fronte desta Comandancia, “velando en todo momento pola produtividade económica do río e a súa sustentabilidade medioambiental”.