TUI

Tui acada o apoio de Paradores á conmemoración do oitavo centenario da consagración da catedral

•  Foi no encontro mantido en FITUR

O alcalde de Tui, Enrique Cabaleiro, e a concelleira de Turismo, Ana Núñez, coa directora de Paradores, Raquel Sánchez

Foto: C.T.

Infogauda / Tui

 O alcalde de Tui, Enrique Cabaleiro, e a concelleira de Turismo, Ana Núñez, reuníronse esta tarde coa directora de Paradores, Raquel Sánchez, e co secretario xeral, Ricardo Mar, logrando o compromiso desta entidade para a difusión, a nivel nacional e internacional, dos actos conmemorativos do 800 aniversario da consagración da catedral de Tui, que terán lugar entre novembro de 2025 e decembro de 2026.  

 Paradores difundirá este destacado evento entre todos os seus clientes, así coma na propia rede de Paradores. Esta é unha primeira colaboracion entre ambas entidades, á que se poderán sumar novas iniciativas a estudar nun próximo encontro que terá lugar en Tui.   

 A actual directora de Paradores, Raquel Sánchez, coñecía xa o municipio porque na súa etapa de ministra aprobara a Axenda Urbana de Tui.