TUI

A maxia do Nadal prosegue esta fin de semana en Tui 

•  A Rondalla Santa Eulalia, de Atios, actuará o domingo. Prosegue o Mercado de Nadal e o Taller Máxico de Papá Noel  

Infogauda / Tui

 Esta fin de semana Tui segue a vivir a maxia do Nadal con música, obradoiros, mercado de Nadal, taller de Papá Noel e o tren turístico da Eurocidade.   

 Esta tarde novos postos presentarán os seus produtos no Mercado de Nadal, no Paseo da Corredoira, que inicia hoxe a segunda quenda desta actividade na que se incorporan NC Jóias, Diente de León 84, Sol Naciente, Los dulces de Albita, Recanto das Laranjeiras, Breaktime.art, Regal-arte-artesanías, Los libros del salvaje, Lulinto e Atelier dos miminhos. Amais continúan os postos de Isa y Loles Artesanía, Club de Patinaxe Ribex, Mel Niño do Corvo, Meigas do Arte, Aloia Protectora de animais, Arte das Meigas e Mari fastudo. A gastronomía segue a estar presente con Churrería chocolatería Patry, con Arte das Meigas, o furgón gastronómico París Dakar  Food truck e venda de castañas asadas. Hoxe venres abrirá a partir das 17 h até ás 21 h, e tanto mañá coma o domingo abrirá de 12 a 14 h e pola tarde de 17 a 21 h, pechando o domingo ás 21 h.   

 A maxia dos elfos e do propio Papa Noel transformou o edificio da praza da Inmaculada nun gran taller que está a facer as delicias de pequenos e maiores cunha coidada decoración que nos transporta até Laponia. Hoxe venres abre de 17 a 20 h e s’ábado e domingo de 12 a 14 h e de 17 a 20 h.  

 As rúas de Tui transformáronse nestas datas grazas á decoración e tamén á iluminación que podemos ir descubrindo en cada paso.  O Tren Turístico da Eurocidade funcionará esta fin de semana, de novo de forma gratuíta grazas ao financiamento do Concello de Tui e da Cámara de Valença, unindo os dous conxuntos históricos tamén coa maxia deste Nadal. As saídas hoxe venres, mañá sábado e o domingo dende a praza da Inmaculada serán ás 11 h, 12 h, 13 h, 16.30 h, 18 h e 19.30 h. Estes horarios poden sufrir alteracións en función do tráfico.  

 No Mercado de San Antonio desenvolverase mañá sábado un obradoiro de postais de Nadal en acuarela con Gemma Marqués Redondeo, para o que é preciso inscribirse en turismo@tui.gal.  

 Se na fin de semana inaugural desta programación foi a rondalla tudense O Mosteiro, de Pexegueiro,  a encargada de levar a música ás rúas, este domingo será a quenda da Rondalla Santa Eulalia, de Atios, que iniciará o seu percorrido ás 18.30 h na rúa Lugo para ir até a Corredoira e rematar a súa actuación no praza de San Fernando, aos pes da Catedral.   

 Mentres o próximo luns, 250 alumnos e alumnas, dos CEIP’s de Guillarei, nº 1, nº 2, Pazos de Reis, Randufe e Rebordáns, levarán as panxoliñas até o Teatro Municipal ás 12 h nunha iniciativa conxunta destes centro educativos que contan co apoio do Concello de Tui.   

 A maxia do Nadal continuará con todas estas iniciativas ao longo da fin de semana en Tui.