O ROSAL

O Rosal pon o foco nun ‘Nadal máis verde!’  

•  O Concello organiza o obradoiro pensado para transformar as festas con sinxelos trucos eco  

•  Sesión para persoas adultas e para crianzas o domingo 22 de decembro de 11 a 13 h. Necesaria inscrición previa   

Infogauda / O Rosal 

 O Rosal quere facer as súas festas máis sustentables. O Concello organiza o vindeiro domingo 22 de decembro o obradoiro ‘Un Nadal máis verde!’, unha iniciativa que busca concienciar e axudar á veciñanza a facer destas datas unha época máis respectuosa co medio ambiente e dar pulo tamén ao comercio local.  

 O obradoiro contará con dúas sesións, unha destinada a persoas adultas que terá lugar no Centro Social Polivalente e outra para nenos e nenas que se desenvolverá na Escola Simón do Mazo. Ambas citas serán de 11.00 a 13.00 horas totalmente de balde con inscrición previa no Concello de forma presencial ou chamando ao teléfono 986 625 000. 

 Co obxectivo de concienciar á veciñanza para aforrar, reducir, regalar e consumir local, o obradoiro ensinará técnicas sinxelas para darlle unha nova vida aos materiais que xa non se usan na casa, creando decoracións, agasallos e outros elementos de forma creativa e sostible. Como destaca a alcaldesa, Ánxela Fernández Callís, “este tipo de iniciativas non só nos axudan a coidar o medio ambiente, senón que ademais nos permite descubrir a beleza da reutilización e aforrar durante estas festas”. 

 A rexedora animou a toda a veciñanza a participar, subliñando que “a sostibilidade é unha responsabilidade de todas e todos e con pequenos pasiños como este obradoiro de Nadal O Rosal segue o seu camiño para converterse nun concello máis verde”.