A GUARDA

O BNG DEMANDA UN PLAN DE USOS PARA A FORTALEZA DE SANTA CRUZ E O SEU CENTRO DE INTERPRETACIÓN 

Anxo Lois Baz: “converter o Centro de Interpretación da Fortaleza de Santa Cruz nunha sala de billar evidencia a falta de criterio do alcalde da Guarda” 

Anxo Lois Baz Vicente, portavoz do BNG, diante do Centro de Interpretación do Castelo (sic) de Santa Cruz

Infogauda / A Guarda

 O  BNG demándalle  “ao alcalde de A Guarda e o seu grupo de goberno, un plan de usos da fortaleza de Santa Cruz que permita poñela en valor, dando a coñecer a súa historia e enchendo de contidos o seu centro de interpretación”.  Así o vén de afirmar, o portavoz do BNG, Anxo Lois Baz Vicente. 

 “A rehabilitación desta fortaleza foi realizada - lembra Anxo Lois Baz - polo Concello de A Guarda coa colaboración da Xunta de Galiza, o Ministerio de Fomento e o Ministerio  de Educación, Cultura e Deportes en Xaneiro de 2014 e está catalogado como un BIC (Ben de Interese Cultural) desde 1.995.  

 A actuación levada adiante neste espazo, entre outras cousas, dotou  este ámbito da infraestrutura necesaria para un Centro de Interpretación das fortalezas transfronteirizas que  dera  a coñecer o sistema defensivo e organizativo a un e outro lado do Río Miño no contexto da denominada “Guerra da Restauración” (1640-1668), na que Portugal recuperou a súa independencia fronte ao Reino de España. 

 Tratábase pois de transformar este lugar nun referente para entender a existencia das grandes fortificacións fronteirizas que hai no Baixo Miño e Alto Minho portugués  e darlle así a  vitalidade e dinamismo que merece.  

 Lamentabelmente o alcalde de A Guarda parece pouco interesado en darlle a función  que lle corresponde a este espazo e o único que se lle ocorre,  como  anunciou fai uns  días nos medios de comunicación,  é  transformalo nunha sala de billar. 

 Darlle este uso ao centro de interpretación dunha fortaleza que é un Ben de Interés Cultural, resulta grotesco e fala moi as claras da falta de proxecto deste goberno e o seu alcalde”.  

 O portavoz do BNG, Anxo Lois Baz Vicente manifestou que “esta falta de criterio por parte do alcalde resulta moi preocupante porque as súas actuacións van exactamente  no sentido contrario ao que deberan ir para  salvagardar e poñer en valor unha das referencias  patrimoniais máis importantes da nosa vila como é a Fortaleza de Santa Cruz”.