PONTEVEDRA

Seguridade viaria  

Abel Losada pide prudencia nas estradas de toda a provincia ata que rematen os traballos de limpeza dos restos do temporal Kirk 

 A Xefatura de Tráfico contabilizou ata 68 incidentes perigosos nas estradas interurbanas durante as peores horas do paso da borrasca 

 Máis dunha ducia de coches colisionaron contra árbores, postes ou outros obstáculos caídos  

Abel Losada, subdelegado do Goberno en Pontevedra

Foto: S. de G.

Infogauda / Pontevedra  

 O subdelegado do Goberno en Pontevedra, Abel Losada, fai unha chamada á prudencia nas estradas de toda a provincia de Pontevedra ata que rematen os traballos de limpeza e retirada de restos vexetais, tralo paso do temporal Kirk. Segundo a información dispoñible a normalidade aínda tardará varios días en chegar diante do extraordinario impacto da borrasca. 

 Losada fixo balance esta mañá, xunto coa Xefatura Provincial e o Subsector de Tráfico da Garda Civil e foi informado de que aínda quedan moitas ramas e restos de cortizas de árbores en toda a rede provincial estatal, autonómica e local, especialmente polos que transcorren por zonas forestais. 

 Segundo os datos da Garda Civil, entre as 22 horas do pasado martes, día 8 e as 15 horas do mércores, día 9, é dicir na franxa horaria de máis intensidade do temporal, producíronse un total de 68 incidencias nas vías interurbanas da provincia, das que un total de 28 traducíronse en danos persoais e materiais. Afortunadamente, subliña o subdelegado, e pese ao crítico da situación vivida tan só hai que contabilizar dúas persoas feridas . Losada destacou que trátase dun balance incompleto, porque a estes datos cómpre sumar as numerosas incidencias en vías urbanas, atendidas directamente polos concellos e das que non hai datos agrupados. 

 O subdelegado recalcou que tan só considerando os 28 accidentes con danos persoais ou materiais nas estradas interurbanas xa estariamos diante dunha incidencia 6 veces superior á dunha xornada normal.  

 O subdelegado felicitou expresamente á Garda Civil de Tráfico e a tódolos servizos de emerxencias, especialmente aos municipais, polo inxente traballo ao longo da noite, a madrugada e toda a mañá da xornada do temporal. A pesar de estar completamente desbordados, afirmou, contribuíron a solucionar os problemas. Tamén citou expresamente aos veciños e veciñas que, a título particular, botaron unha man na corta e retirada de restos vexetais colaborando coa Garda Civil e as policías locais. 

 A información oficial da Garda Civil dá conta de máis dunha ducia de colisións de vehículos contra árbores caídas. O municipio de Ponteareas, con 5 sinistros, foi o máis afectado, aínda que tamén se produciron colisións en Pontevedra, Vigo, Cerdedo-Cotobade, Poio, A Estrada, A Lama e Silleda. Tamén houbo colisións contra postes caídos e un camión impactou contra o cableado dun tendido eléctrico. Varios camións e un autobús quedaron bloqueados en tramos de estradas anegados en Ponte Caldelas, Meis, Campañó e Crecente. Neste último caso tratábase dun vehículo cisterna que circulaba pola A-55 cargado de gasoil e gasolina. A Garda Civil tivo tamén que intervir na N-550 á altura de Ponte Sampaio ao atoparse placas do tellado de Pontesa na calzada. Ademais, foi preciso retirar a lona dun camión da calzada na ponte da AP-9 en Pontevedra. 

 Os anegamentos foron especialmente intensos na PO-11 en Pontevedra a primeira hora da mañá, coincidindo coa suba da marea, e obrigando a cortar a circulación. 

 Finalmente, o subdelegado foi informado que entre os numerosos vehículos danados por Kirk figuran un coche da propia Garda Civil de Tráfico e unha furgoneta de Conservación de Estradas aos que lle caeu enriba unha árbore cando atendían unha incidencia no Porriño.