DOZÓN

Visita á Gandaría Vázquez S.C., en Dozón    

Abel Losada destaca que o Goberno de España ultima 15 millóns en axudas para resarcir as perdas causadas pola EHE mentres a Xunta segue cruzada de brazos  

• “Cada vez que hai unha crise no sector Primario o Goberno de España reacciona e a Xunta queda cruzada de brazos” 

•  Reclama da Xunta que incorpore, como mínimo, o mesmo volume de axudas ao sector gandeiro e a máxima axilidade na súa tramitación 

Luís Vázquez e súa filla Raquel Vázquez - que con 18 anos vén de incorporarse á explotación -, con Abel Losada, subdelegado do Goberno en Pontevedra

Foto: S. de G.

Infogauda / Dozón

 O subdelegado do Goberno en Pontevedra, Abel Losada, reclamou esta mañá en Dozón que a Xunta de Galicia tome medidas de maneira urxente e se poña a carón dos gandeiros “como está a facer o Goberno de España” ante a incidencia da Enfermidade Hemorráxica Epizoótica (EHE) do gando vacún, que está azoutando a cabana gandeira de comarcas como a do Deza, foco da enfermidade xunto con outras cinco zonas da provincia, nas que os produtores están sufrindo perdas moi importantes.  

 “Mentres o Goberno de España ultima un Real Decreto con 15 millóns de euros a transferir ás Comunidades Autónomas coas que cubrir as perdas dos gandeiros e xa achegou a vacina, vemos como a Consellería de Medio Rural non está nin se lle espera, a pesar de ter as competencias en gandaría”, lamentou Losada. Para o subdelegado isto é “un déjà vu” [en galego, un xa visto], pois como sucede cada vez que hai unha crise no sector primario, o goberno de Rueda permanece sentado e agardando a que o problema se resolva só”. En contraposición ao “abandono ao que a Xunta somete aos gandeiros”, engadiu, “temos a un Ministerio de Agricultura liderado polo ministro Luis Planas que puxo a andar a maquinaria administrativa para aportar solucións respaldadas por unha importante cantidade económica”. 

 Nesta liña, incidiu en que o Real Decreto, que se aprobará nos próximos días, incluirá unha partida económica moi importante que se transferirá a Galicia para impulsar axudas aos gandeiros, que serán compatibles coas achegadas polas administracións rexional, europeo e local. As mesmas terán carácter retroactivo e deberán  ir destinadas a paliar os efectos económicos que a EHE está a causar no sector gandeiro. Serán as Comunidades Autónomas as encargadas de convocar e repartir as axudas financiadas polo Ministerio, pero dende o Goberno de España está a reclamarse que se complementen con fondos propios. 

 Doutro lado, Losada lembrou que “as únicas axudas publicadas en xaneiro de 2024 pola Xunta, se aplican só no caso de que o animal morra, pero non teñen en conta os gastos sanitarios, nin as perdas de produtividade, amais de ter un baremo de indemnización moi baixo, fronte ao establecido por outras comunidades”. 

 Durante a visita á Gandaría Vázquez S.C., onde o subdelegado comprobou os efectos da EHE na cabana gandeira, esixiu do goberno galego “como mínimo o mesmo compromiso, tamén en termos económicos, que o adquirido polo Ministerio de Agricultura para apoiar o sector fronte esta enfermidade”.  

 “Mentres o Goberno de España traballa, non sabemos a que agarda a Consellería para poñerse do lado dos gandeiros e impulsar as súas axudas; non abandonar por máis tempo o sector ante as perdas económicas que produce a EHE”, sentenciou.  

 Losada explicou que a evolución da enfermidade desde 2022, data do seu inicio en España, está a ser a previsible, polo que as Comunidades Autónomas poden tomar as medidas que consideran oportunas en materia de prevención ou axudas financeiras para medicamentos ou tratamentos “pero a Xunta non fixo nada”.  

 Recalcou, nesta liña, o compromiso do Ministerio para aportar unha vacina, que xa está a disposición das comunidades. Ademais, o MAPA está valorando a restrición de circulación de gando entre comunidades e incluír a EHE dentro das coberturas dos seguros agrarios ENESA. 

 Por último, o subdelegado deixou claro que o gandeiro é “un sector estratéxico, non só no aspecto económico, senón tamén no papel que xoga para vertebrar e preservar o territorio e o mundo rural, polo que debemos apostar pola gandaría sostible e de calidade, como a da explotación que hoxe visitamos en Dozón”. 

Máis de 20 animais infectados 

 Gandaría Vázquez S.C., situada na parroquia de Saa, é unha gandaría de carne de referencia na comarca do Deza. Propiedade de Luís Vázquez e da súa filla, Raquel Vázquez, que con 18 anos vén de incorporarse á explotación, conta cunhas 260 cabezas en extensivo de diferentes razas. Nas últimas semanas suman máis de 20 animais infectados pola EHE. Tanto Raquel como Luis Vázquez explicaron as dificultades e perdas que esta patoloxía supón, pois amais dos custes veterinarios dos tratamentos, os animais reducen enormemente a súa produtividade e chegan a perder as súas crías.