A GUARDA

Novo xogo de escape de Eureka Reto Rural para mergullarse na esencia mariñeira da Guarda 

O concello guardés vai acoller o cuarto xogo de escapismo dixital posto en marcha por Eu Rural e o Xeodestino Ría de Vigo e Baixo Miño 

Será o sábado 15 de xuño ás 20.00 h. Inscricións abertas na web

Vista parcial do porto de A Guarda

Foto: Infogauda

Infogauda / A Guarda  

 Aventura, historia e cultura mesturaranse para mergullarse no pasado mariñeiro da Guarda nun novo desafío de ‘Eureka Reto Rural’, unha iniciativa posta en marcha por EuRural e o Xeodestino Ría de Vigo e Baixo Miño a través da que se están a realizar xogos de escapismo temáticos ao aire libre, de forma dixital e para todos os públicos. Un proxecto que permite ir percorrendo o territorio para descubrir a riqueza dos 14 concellos do territorio dun xeito ameno, divertido e orixinal.  

 Este sábado 15 de xuño A Guarda acolle un novo encontro no que as persoas participantes terán a oportunidade de explorar a Casa do Pescador, un lugar emblemático que revela moitos aspectos da vida dunha vila mariñeira. A historia dos diques, fundamentais na protección da vila; a atalaia dende onde os vixiantes protexías as costas; a importancia da xente do mar ou das cetáreas e a rica gastronomía guardesa serán outros aspectos que o público irá descubrindo durante o percorrido. 

 O xogo de escape partirá ás 20.00 horas do Auditorio de san Bieito nunha ruta circular de dificultade moderada e accesible. As persoas que desexen participar deberán inscribirse de forma individual a través do formulario habilitado na web do Xeodestino Ría de Vigo e Baixo Miño e acudir ao punto de encontro. Todas e todos os menores de 12 anos deben ir acompañados dunha persoa adulta. Ademais de poder realizarse o día de estreo, o escape room permanecerá aberto ao público durante un mes a través da web do Xeodestino Ría de Vigo e Baixo Miño para que calquera persoa poida desfrutar da experiencia.  

 Sandra González, presidenta da Asociación de Desenvolvemento Galicia Suroeste EuRural, convidou a todas as persoas a participar nestes xogos de escapismo ao aire libre, “unha oportunidade única para conectar co noso patrimonio, fomentar un turismo sostible e promover o coñecemento do noso territorio dunha forma orixinal e entretida. As persoas que participan non só viven unha emocionante aventura, senón que ao rematar levan consigo un anaco da nosa cultura e tradicións”. 

 Como sinala o alcalde da Guarda, Roberto José Álvarez Carrero, “esta iniciativa pon en valor o noso patrimonio mariñeiro mediante un xogo que permitirá a veciñanza e visitantes descubrir con maior profundidade a cultura mariñeira, que é a esencia de como se formou a nosa vila. As rúas, as casas e a economía xiraron arredor ao porto”. “Esta actividade será moi interesante e divertida, percorrendo rúas e recunchos do noso porto pesqueiro, polo que convidamos a todas as persoas interesadas a inscribirse para este sábado”, anima o rexedor.  

 O equipo que consiga superar a proba no menor tempo posible gañará unha experiencia para descubrir a paisaxe natural de Prado, en Gondomar, con cea degustación e aloxamento na Lonquexa do Gañán. Ademais, entre todas as persoas participantes o Concello da Guarda sorteará un lote de produtos de degustación do mar valorado en 150 euros.   

 É importante lembrar que será unha fin de semana chea de escape rooms no territorio. Xunto coa cita na Guarda o sábado 15, o domingo 16 de xuño temos outro encontro en Mos para descubrir os segredos da Festa da Rosa tras adiarse a data inicial prevista por mor da choiva. O escape room de Mos sairá ás 11.00 horas do Pazo de Mos. 

 As seguintes datas, concellos e temáticas dispoñibles tras Nigrán serán: 

- 16 de xuño. Mos. ‘Festa da Rosa’. 

- 22 de xuño. O Porriño. ‘Antonio Palacios’. 

- 30 de xuño. Oia. ‘O mosteiro de Oia’. 

- 6 de xullo. Gondomar. ‘O Conde no Camiño’. 

- 12 de xullo. O Rosal. ‘O sector vinícola’. 

-   14 de xullo. Fornelos de Montes. ‘Festa gastronómica da carne do Suído e da Chanfaina’. 

- 20 de xullo. Tomiño. ‘Camiño da Nosa Señora do Norte’. 

- 27 de xullo. Pazos de Borbén. ‘A emigración: As casas indianas’. 

- 14 de agosto. Soutomaior. ‘María Vinyals’. 

- 20 de setembro. Redondela. ‘A historia da nosa vila’. 

 Toda a información pormenorizada das actividades, con horario e puntos de encontro están dispoñibles na web do Xeodestino Ría de Vigo e Baixo Miño.