A GUARDA

A Guarda rende tributo á música que nace da terra  

• A Agrupación Musical de A Guarda reunirá no Auditorio de San Bieito a banda, e os grupos Vento Mareiro e Do Lusco ó Fusco nunha tarde dedicada á música tradicional galega 

 

Ricardo Rodríguez Vicente/A Guarda

 Hai músicas que non precisan presentación. Chegan co son dunha gaita, co pulso dun tambor, coa memoria dunha melodía que pasa de xeración en xeración e que, dalgún xeito, segue a falar de nós. A Guarda volverá poñer en valor esa música que forma parte da identidade galega cun concerto que reunirá sobre o escenario distintas maneiras de entender e vivir a tradición.  

 A Agrupación Musical de A Guarda organiza o vindeiro sábado, 22 de agosto, ás 20:00 horas, no Auditorio de San Bieito, un Concerto de Música Tradicional Galega no que participarán a Banda de Música da Agrupación Musical de A Guarda e os grupos Vento Mareiro e Do Lusco ó Fusco.

 Será unha cita para escoitar, pero tamén para lembrar. Porque a música tradicional non é só un repertorio de pezas antigas: é memoria, festa, reunión e identidade. É a banda sonora de moitas celebracións e de tantas horas compartidas nas parroquias, nas romarías e nas prazas. Un patrimonio que continúa vivo precisamente porque hai quen o interpreta, o transmite e o fai chegar ao público.  

 A presenza da Banda de Música da Agrupación Musical de A Guarda achegará ao concerto a forza e a riqueza sonora dunha formación profundamente vinculada á vida cultural guardesa. Xunto a ela, Vento Mareiro e Do Lusco ó Fusco completarán un programa no que a tradición será a gran protagonista, nun encontro de músicos e sensibilidades arredor da música feita e sentida en Galicia.

 O escenario do Auditorio de San Bieito converterase así, por unhas horas, nun espazo para reencontrarse cos sons propios e para reivindicar o valor dunha cultura musical que continúa a formar parte do presente.  

 A proposta conta coa colaboración da Deputación de Pontevedra e do Concello de A Guarda, nunha iniciativa que aposta pola difusión da música galega e polo apoio á actividade cultural local.

 Dese xeito, A Guarda ten unha cita coa súa música. Unha desas citas nas que as notas non só soan: evocan, reúnen e contan quen somos.