A GUARDA

“Visita A Guarda na Ponte da Constitución” 

• Nova campaña para dar a coñecer a nosa vila 

 

Vista parcial do Poboado Calvo, no xacemento arqueolóxico do Monte Santa Trega (A Guarda)

Infogauda / A Guarda

 Os turistas e visitantes que escollen A Guarda, percorren o noso territorio grazas ás rutas, gozan da nosa natureza no Esteiro do Miño, visitan o Monte Santa Trega, descobren a vida mariñeira no porto e no Museo do Mar e degustan a nosa gastronomía e produtos locais.  

 Para completar a visita a estes recursos e para que veciños e visitantes coñezan en detalle o noso patrimonio e historia ofreceranse visitas guiadas de balde coincidindo co días principais da Ponte da Constitución.   

 Para esta campaña especial as visitas guiadas centrase nos dous grandes referentes de A Guarda: o Monte Santa Trega, e o porto pesqueiro xunto co casco antigo.  

Visita guiada ao Castro do Monte Santa Trega 

 O Monte Santa Trega é un dos recursos máis destacados de Galicia e un dos exemplos mellor conservados da Cultura castrexa.  

 Esta visita guiada comeza ás 12:00h e conta cunha duración máxima dunha hora e centrase no valor arqueolóxico da zona escavada do Castro do Monte Santa Trega.  

 O punto de encontro é a Casa Forestal que se atopa despois de cruzar o castro, alí pódese aparcar o vehículo. 

 A ruta, de menos dun quilómetro, percorre o Barrio Mergelina e remata nas vivendas reconstruídas o que permitirá coñecer en detalle a Cultura Castrexa e como vivían os poboadores do Trega, hai máis de 2.000 anos.  

 O prezo por acceso ao monte en vehículo non está incluído nesta actividade.  

Recorre o casco antigo e porto pesqueiro 

 A Guarda é unha vila mariñeira que creceu en torno á pesca e, polo tanto, o seu porto. A novidade para esta ponte é a oferta desta visita guiada que trasladará aos visitantes ao pasado medieval da vila. Esta visita comeza ás 17:00h na Praza do Reloxo, xunto a Oficina Municipal de Turismo, e grazas a explicación desta praza poderase coñecer unha parte importante da historia da Guarda. O percorrido inclúe os edificios relixiosos do casco antigo como a igrexa parroquial de Santa María e o antigo mosteiro de San Bieito; os puntos máis antigos como rúa Colón ou Malteses, e amosarase a importancia na historia deste porto pesqueiro.   

 Estas visitas guiadas realizaranse os seguintes días: mércores 6, xoves 7, venres 8 e sábado 9 de decembro. 

 Non se precisa inscrición previa. As persoas interesadas tan só terán que presentarse minutos antes do comezo da visita.   

 Ademais, con motivo da Ponte da Constitución a Rede de Museos de A Guarda conta cunha apertura ampliada: 

• MASAT (Museo Arqueolóxico do Monte Santa trega). Do martes ao domingo: 10:00 a 19:00h. 

• Museo do Mar. De mércores a domingo (excepto xoves 7/12): 11:00 – 14:00 / 16:00 -19:00h 

• Fortaleza de Santa Cruz: Espazo público aberto todos os días: 10:00-18:00h.  

 Por último, recordar que a Oficina Municipal de Turismo contará tamén cun horario especial e estará aberta de martes a sábado de 10:00 a 14:00 e de 16:30 a 18:30h. 

 Tamén pódese consultar no enderezo electrónico turismo@aguarda.es ou no teléfono: 986 61 45 46.