A GUARDA

A Guarda formará parte do circuito de concellos que conforman o Ciclo Mestre Mateo 2023  

• E que presentará nas 23 localidades escollidas, as proxeccións das longametraxes finalistas na edición 2023 dos Premios Mestre Mateo 

  

Infogauda / A Guarda

 Neste mes de xuño comezará na Guarda o Ciclo Mestre Mateo, unha iniciativa da Academia Galega do Audiovisual que conta coa colaboración das catro deputacións provinciais, para poder amosar o mais novidoso e relevante do noso cinema nas vilas de Galicia.  

 Esta proposta que tivo a súa primeira edición o pasado ano 2022, suma neste 2023 novas localidades entre as que se atopa  a vila de A Guarda. O ciclo conleva a proxección de 8 filmes, de ficción, documental e animación que se proxectarán entre os meses de xuño e novembro.  

 O ciclo comezará no mes de xuño coa proxección - no Centro Cultural - de dúas longametraxes de ficción: o 8 de xuño con Código Emperador, filme de acción dirixido por Jorge Coira estreado no XXIV Festival de Málaga, onde tamén tivo a súa estrea a longametraxe Live is life (Dani de la Torre, 2022); que poderá verse na Guarda o 29 de xuño.  

 Durante o verán o ciclo fará unha pausa para retomarse no mes de outubro, cando poderemos ver a gran gañadora da edición 2023: O Corpo Aberto, que se fixo con 12 galardóns na presente edición dos premios Mestre Mateo 2023. Outros filmes que teremos a oportunidade de ver nos meses de outubro son:  o documental María Casares, a muller que viviu mil vidas, e Unicorn Wars recoñecidas como mellor documental e mellor longametraxe de animación, respectivamente. O filme de animación Valentina, que foi gañadora no 2022 do Goya á mellor longametraxe de animación, así como os documentais A foreign song (César Souto, 2022) gañadora dos premios á mellor longametraxe española e mellor dirección española no pasado Festival Internacional de Cine de Xixón; e Onde máis doe (Manane Rodríguez, 2022) estreada no OUFF – Ourense Film Festival.  

 Na web ciclomestremateo.gal pódese consultar toda a información do ciclo, así como as fichas das películas e a axenda de proxeccións, que reproducimos a continuación:  

8 de xuño, ás 21:00h.

Código Emperador.   

29 de xuño,  ás 21:00h. 

Live is life. 

7 de outubro, ás 18:00h.  

Valentina.

11 de outubro, ás 21:00h 

O corpo aberto. 

26 de outubro, ás 20:30h. 

A foreign song. 

10 de novembro, ás 20:30h.

Unicorn Wars. 

16 de novembro, ás 20:30h.

Onde máis doe. 

30 de novembro, ás 20:30h.

María Casares a muller que viviu mil vidas.