A GUARDA

O albergue da Guarda deu aloxamento a case 16.000 peregrinos desde 2010

 Grupo de scouts italianos que fixeron o Camiño Portugués da costa, nun descanso na Alameda da Guarda

 

Antón Ferreira  / A Guarda

 O albergue de peregrinos da Guarda acolleu, desde a súa apertura en 2010 e ata o día de hoxe, a 15.829 peregrinos que fixeron o Camiño Portugués da Costa e decidiron durmir neste aloxamento municipal, cifra que sería moito maior se a Covid non obrigase a pechar o albergue practicamente todo o ano 2020 e a metade de 2021, reducíndose no ano 2021 a súa capacidade a case un terzo do aforo por cuestións sanitarias. A esta cifra de más de 15.800 peregrinos habería que engadir aqueles outros que optaron por aloxarse nos diferentes establecementos hoteleiros da localidade e os que se decidiron polo albergue privado O Peirao.

 O Albergue da Guarda deu durmida a peregrinos de diferentes nacionalidades; peregrinos que chegaron desde as terras de Rusia ás da República de Sudáfrica; desde Canadá a Xapón. Desde grandes países, como Estados Unidos ou Rusia, a pequenas illas perdidas no Índico, como San Mauricio. Peregrinos, tamén, de diferentes culturas ou crenzas: cristiáns e agnósticos; árabes e correntes filosóficas orientais que procuraban a espiritualidade que se pode atopar no Camiño; aqueles que facían o Camiño buscando coñecer “que é iso do Camiño”, e aqueloutros que só trataban de ver paisaxes diferentes ou outros lugares da forma máis económica, porque no Camiño cabemos todos.

 Todos conviviron e compartiron –conviven e comparten- experiencias persoais ou menos privadas. Falaron –e falan- dos motivos que lles impulsaron a facer o Camiño; prestáronse –e préstanse- mutuo apoio, compartiron –e comparten- mesa e mantel e se intercambiaron –e intercámbianse- pratos típicos das distintas rexións ou países. Fixéronse fotos uns cos outros, e facilitáronse, entre eles, os enderezos electrónicos para continuar o contacto.

 O Albergue da Guarda foi unha parte do encontro entre peregrinos que comezaron aquí unha relación amigable que, sen dúbida, se prolongará no tempo, máis alá de Santiago de Compostela.