OIA

O Mosteiro de Oia renova con forza a súa participación en Europa  

A entidade Real Mosteiro de Oia foi convidada a pasada fin de semana ao IV Encontro Internacional de Abadías  Cistercienses, celebrado no Mosteiro de Alcobaça, Portugal, en calidade de relatora. 

  

Participantes no IV Encontro Internacional de Abadías Cistercienses celebrado no Mosteiro de Alcobaça

Fotos: R.M.O

Infogauda / Oia

  A sociedade mercantil Real Mosteiro de Oia foi convidada ao IV Encontro Internacional de Abadías Cistercienses, celebrado a pasada fin de semana no Mosteiro de Alcobaça (Portugal), en calidade de relatora. No mesmo, déronse cita representantes dos principais mosteiros e abadías  cistercienses de Europa, responsables de institucións como a UNESCO, o Instituto Europeo de Itinerarios Culturais, investigadores de varias universidades contando coa inestimable presenza do Procurador Xeral da Orde do  Císter, para debater os novos desafíos de xestión do patrimonio  cisterciense derivados dun  desenvolvimiento sostible. 

 

Xoán Martínez, director xeral da sociedade mercantil Real Mosteiro de Oia, nun momento da súa intervención no IV Encontro Internacional de Abadías Cistercienses

 O seu director xeral, Xoán Martínez, explicou ante un nutrido e variado público de máis de seis nacionalidades "o desafío que supón aplicar a sustentabilidade en todas as súas vertentes ao patrimonio e en concreto no caso de Oia. Esta temática xerou un enriquecedor debate que terá continuidade dado o seu impacto, fomentando as partes o intercambio de coñecementos, experiencias e iniciativas".  

 Alcobaça, acolleu e reuníu, un ano máis este importante foro internacional facéndoo coincidir con dous importantes aniversarios: o da fundación deste impresionante complexo monástico, Patrimonio da Humanidade desde 1989, e a conmemoración do 50º Aniversario da Convención para a Protección do Patrimonio Mundial Cultural e Natural da UNESCO.  

 "O Real Mosteiro de Oia forma parte activa desde hai máis de dúas décadas das dinámicas europeas de posta en valor desta orde monástica que vertebrou Europa, sendo membro da Carta Europea do  Císter desde o ano 2010. Desde entón asistiuse a numerosos encontros promovidos polo organismo europeo en centros cistercienses de primeira orde en Francia, Bélxica, Alemaña ou Italia, nos cales se traballa de forma conxunta para desenvolver e potenciar proxectos transnacionais sobre o patrimonio  cisterciense, por exemplo o Itinerario Cultural Europeo das Abadías  Cistercienses", afirmou Xoán Martínez.