O ROSAL

O Concello do Rosal estrea web para mellorar a comunicación coa veciñanza  

Cun deseño renovado e fresco, a páxina está centrada en facilitar á persoa usuaria o acceso á información e aos trámites  

    

Ánxela Fernández Callís, alcaldesa do Rosal na presentación da renovada páxina web do concello

Foto: C.O.R.

 

Infogauda / O Rosal

 O Rosal continúa mellorando a súa comunicación coa veciñanza para ser máis accesible e transparente. Neste camiño, o Concello acaba de renovar a súa páxina web cun deseño fresco, atractivo, limpo, visual e intuitivo, con novos contidos adaptados á actualidade do municipio. Integrada coa nova imaxe institucional do Concello, a nova web une pasado, presente e futuro do Rosal cunha estética actualizada e contemporánea.  

 “Vivimos novos tempos no que cada vez damos máis importancia ao dixital e empregamos as novas tecnoloxías para todo, tamén para a nosa comunicación coas administracións. Por iso é fundamental ter unha web na que a veciñanza poda atopar ou realizar os trámites que precise do xeito máis cómodo posible”, explica a alcaldesa, Ánxela Fernández Callís. 

 A nova páxina web conta cunha reorganización da información centrada na persoa usuaria, para que poida atopar de xeito rápido e sinxelo o que busca, cun espazo de actualidade moi visible e accesible e con espazos destacados nos que salientar aspectos ou cuestións relevantes en cada momento. Tamén se incorpora un espazo máis activo e dinámico para as redes sociais co obxectivo de “ofrecer á veciñanza inmediatez e actualidade”. 

 Ademais de toda a información relativa á organización municipal, trámites, ordenanzas e regulamentos e todos os elementos necesarios da renovada identidade gráfica do Concello, a web conta tamén con acceso directo á administración dixital e a áreas municipais como cultura, urbanismo, igualdade, benestar social, turismo, medioambiente, infancia e mocidade, emprego ou ao mercado municipal.  

 Unha nova web que “pretende ser un portal de comunicación vivo entre o Concello e a veciñanza, que sexa útil e que poida empregarse comodamente no día a día para estar informado e realizar todos os trámites necesarios”.