A GUARDA

“CARRERO E O PP ESTÁN AUSENTES NOS GRAVES PROBLEMAS QUE PADECE O POBO DA GUARDA”  

Beatriz Lomba (BNG): “Un frustrado Carrero quere ocultar a incompetencia do PP ao  ver que o  BNG apoia iniciativas positivas para a xente da Guarda”  

Beatriz Lomba Rodríguez, viceportavoz do Grupo Municipal do BNG da Guarda

Infogauda / A Guarda

 A viceportavoz do Grupo Municipal do BNG da Guarda, Beatriz Lomba Rodríguez, saíu ao paso das últimas declaracións do portavoz do PP, Roberto José Álvarez Carrero, afirmando  que “o BNG está por resolver os problemas que lle afectan a veciñanza da Guarda e pouco interesado en resolver a frustración e incompetencia do cabeza do PP na localidade”.   

 A concelleira engadiu que “Carrero e o PP están ausentes nos graves problemas que padece o pobo da Guarda, como é a sanidade pública, as comunicacións con Caminha ou  intentando  boicotear nun primeiro momento a reforma integral do pavillón da Sangriña. En cambio é curioso que, perda o tempo en criticar as decisións do BNG que son positivas para a veciñanza da Guarda, tratando deste xeito de  ocultar a súa incapacidade para defender calquera alternativa en positivo para este pobo. A piques de cumprirse tres anos deste mandato foron  incapaces de presentar unha soa proposta propia”.  

 Respecto ao portavoz do Grupo Municipal do Partido Popular no Concello de A Guarda, Beatriz Lomba, manifestou finalmente: “A súa torpeza púxose de manifesto dunha maneira moi evidente cando o BNG levou a pleno a iniciativa de optar pola alternativa que defendía Patrimonio para desbloquear a tramitación do novo acceso ao porto. O Sr. Carrero, en vez de apoiar a iniciativa do BNG en base aos informes de Patrimonio da Xunta de Galiza, optou por aliarse co alcalde Antonio Lomba, do PSOE, conseguindo deste xeito que o proxecto siga paralizado. Non é menos grave a falta absoluta de criterio do PP votando en contra dunha subvención de 600.000€ para levar adiante a reforma integral do pavillón da Sangriña” .