Comezaron as obras de reforma e adecuación das dependencias da Policía Local
• Durante a execución das obras a Policía Local prestará atención á cidadanía no primeiro andar do edificio do concello vello.
Infogauda / A Guarda
O equipo de goberno municipal do Concello de A Guarda vén de facer público que "fai uns días iniciáronse os traballos para a reforma e adecuación á norma das dependencias da Policía Local, a través dunha axuda por importe de 39.813,19€ da Vicepresidencia primeira e Consellería de Presidencia, Xustiza e Turismo da Xunta de Galicia.
Con esta reforma preténdese modernizar, ampliar e adecuar ás necesidades actuais as dependencias policiais, mellorando a zona de atención ao público e ampliando o espazo para oficinas. Tamen se habilitará un espazo para sala de reunións e dotaranse duns novos vestiarios.
En total preténdese ampliar as infraestruturas existentes ata os 183m2, con dúas oficinas, vestiarios diferenciados para homes e mulleres, almacén e sala de xuntas, empregando parte das vellas instalacións de Servizos Sociais.
Para o alcalde de A Guarda, Antonio Lomba, esta é unha actuación moi importante, posto que vén a mellorar as condicións de traballo dos membros da Policía Local, nunhas instalacións que precisaban unha urxente rehabilitación e adaptación aos tempos que corren, o que permitirá prestar un mellor servizo a toda a cidadanía guardesa. Este proxecto está na liña de modernización das dependencias municipais que se vén producindo dende que se construiu o novo concello na Casa dos Alonso.
O orzamento desta licitación é de 47.00,94 € sen IVE (o orzamento con IVE é de 56.875.98 €). O prazo de execución das obras é de 45 días hábiles".
Ningún comentario:
Publicar un comentario