O Concello de A Guarda anima a visitar o Museo Arqueolóxico do Monte Santa Trega e o Museo do Mar
• Os museos guardeses preséntanse coma unha boa alternativa cultural e turística para esta longa fin de semana
Infogauda / A Guarda
O equipo de goberno local anima a veciños a visitantes a visitar nesta fin de semana o Museo Arqueolóxico do Monte Santa Trega (MASAT) e o Museo do Mar.
Museo Arqueolóxico do Monte Santa Trega (MASAT)
O Museo Arqueolóxico do Monte Santa Trega (MASAT) ocupa o edificio deseñado como restaurante polo arquitecto porriñés Antonio Palacios Ramilo. Por subscrición popular, a Sociedad Pro.Monte Santa Tecla comprou e adaptou o inmoble inaugurado como Museo en 1953 e no que se depositaron os materiais almacenados ata ese momento nun céntrico local da vila de A Guarda.
Ofrece o MASAT unha completa colección de labras e esvásticas castrexas, útiles líticos, moedas romanas, fragmentos de obxectos cerámicos, pezas de vidro,…, e como pezas singulares destacan un espléndido remate de torques decorado con finas filigranas e o cabezón do Trega, o achado máis emblemático das escavacións realizadas recentemente.
Horario:
De martes a domingo:
Do 15/03 ao 31/03: de 10:00 a 19:00h
Do 1/04 ao 30/06: 10:00 a 20:00h
Tarifa actual de acceso ao Monte Santa Trega (inclúe o acceso ao MASAT): 1 € adultos 0.50 € menores de 14 anos
Museo do Mar
O Museo do Mar atópase no Porto de A Guarda, nunha atalaia ao final do paseo marítimo e conta con dúas coleccións: unha etnográfica cunha mostra das antigas artes de pesca e os seus aparellos e outra malacolóxica, cunha selección de cunchas de mar procedentes de todo o mundo.
Unha parte do patrimonio inmaterial da localidade está recollido en vídeos editados polo Concello: “Xentes do mar”, “Lendas de mar”, “Mulleres do mar” e “Tesouros vivos”.
Horario:
Sábados, domingos e festivos: De 11:00 a 14:00h e de 16:00 a 19:00h.
Tarifas:
1€ Adultos
0,50€ menores de 14 anos
Ningún comentario:
Publicar un comentario